جنوبي کوریا له چین څخه د کوریا ټاپو وزمه له اټومي وسلو څخه د پاکولو په برخه کې د مرستې غوښتنه وکړه.

د جنوبي کوریا د ولسمشرۍ دفتر ویلي دي چې  د جنوبي کوریا نوې ادارې د سې شنبې په ورځ له چین څخه وغوښتل چې د کوریا ټاپووزمې د اټومي وسلو پاکولو په بهیر کې مرسته وکړي.

سیول د بیجینګ څخه د دې بهیر په اړه د "رغنده رول" لوبولو غوښتنه وکړه، چې دا غوښتنه د چین ولسمشر شي جین پینګ او د جنوبي کوریا نوي ټاکل شوي ولسمشر لي جې میونګ ترمنځ د لومړۍ ټیلیفوني خبرې پر مهال وشوه.

لي تېره اونۍ د ولسمشر په توګه هله وټاکل شو چې د سږ کال د ولسمشرۍ بېړنۍ ټاکنې یې وګټلې. دغه ټاکنې د پخواني ولسمشر یون سوک یول د واک څخه د لرې کېدو وروسته ترسره شوې، چې د تېر ډسمبر په میاشت کې یې د نظامي قانون د نافذولو ناکامه هڅه وکړه.

د جنوبي کوریا د ولسمشرۍ ویاندې کانګ یو جونګ په وینا شي جین پینګ لي ته وویل چې چین به د دې ستونزې د حل لپاره هڅې وکړي.

شي زیاته کړه: "د ټاپووزمې د سولې او ثبات هڅول به د جنوبي کوریا او چین دواړو لپاره ګډې ګټې ولري."

د کوریا ټاپووزمه له ۱۹۵۰مو کلونو د کوریا د جګړې راهیسې وېشل شوې پاتې ده، او سیول په پرله‌پسې ډول له پیونګ یانګ څخه د اټومي وسلو د ختمولو غوښتنه کړې، چې لومړی ځل یې په ۲۰۰۶ کال کې ازموینه وکړه.

د وېشل شوو کوریاوو ترمنځ اړیکې د ۲۰۲۲ کال راهیسې، کله چې د جنوبي کوریا لرې کړل شوی ولسمشر یون واک ته ورسېد، په خپل ټیټ حد کې پاتې دي.

شي او لي د دوه اړخیزو اړیکو، سوداګرۍ او "ستراتیژیکې همکارۍ ملګرتیا" په اړه هم خبرې وکړې.

شي وویل چې چین او جنوبي کوریا باید خپله ستراتیژیکه همکاري ملګرتیا لوړې کچې ته ورسوي.

دا د لي لپاره له بهرنیو مشرانو سره درېیمه ټیلیفوني اړیکه وه. هغه مخکې د امریکا له ولسمشر ډونالډ ټرمپ او د جاپان له لومړي وزیر شیګیرو ایشیبا سره خبرې کړې وې.

شي د بیجینګ او سیول ترمنځ د څو اړخیزتوب او آزادې سوداګرۍ د ګډې ساتنې غوښتنه وکړه، ترڅو نړیوال او سیمه‌ییز صنعتي او اکمالاتي ځنځیرونه باثباته او روان وساتل شي.

هغه ټینګار وکړ چې دواړه خواوې باید د سیمه‌ییزو او نړیوالو حالاتو لپاره "زیاته یقیني فضا رامنځته کړي."

د سیول مېشت یونهاپ خبري اژانس راپور له مخې لي شي ته د نوامبر په میاشت کې د آسیا-پاسیفیک اقتصادي همکارۍ (APEC) غونډې لپاره جنوبي کوریا ته د راتګ بلنه ورکړه.

لي وویل: "چین زموږ لپاره په ټولو برخو کې، په شمول د اقتصاد او امنیت، یو مهم شریک دی.

زه هیله لرم چې دواړه هېوادونه، چې سږ کال او راتلونکی کال د APEC مشري کوي، د دې غونډې په مناسبت نږدې همکاري وکړي او داسې ستراتیژیکه همکاري ملګرتیا جوړه کړي چې د دواړو ملتونو د ژوند لپاره ریښتینې ګټه ورسوي."

د جنوبي کوریا ولسمشر د چین سره د دوه اړخیزې همکارۍ غوښتنه وکړه چې "د متقابلې ګټې او مساواتو په روحیه ولاړه وي."

لي او شي د کوریا ټاپووزمې د سولې او ثبات لپاره د ګډو هڅو په اړه هم موافقه وکړه.