ایفبياي ویلي دي چې په میشیګان کې پر کنیسه برید یو «هدفي برید» و
"چارواکي وايي بریدګر خپل پکاپ موټر ډېټرویټ ته نږدې یوې کنیسې ته دننه کړی او وروسته امنیتي ساتونکو ورباندې ډزې کړي دي؛ FBI دا پېښه د یوه هدفي تاوتریخوالي په توګه څېړي.
د فدرالي تحقیقاتي ادارې (FBI) په وینا، یو بریدګر چې په ټوپک سمبال و، وروسته له هغه په ډزو ووژل شو چې خپله واسطه یې د امریکا یوې تر ټولو لویې اصلاح غوښتونکې کنیسې ته دننه کړه. په ډېټرویټ کې د FBI د ساحوي دفتر مشرې جینفر رونیان دا پېښه «خورا اندېښمنونکې او غمجنه» وبلله او ویې ویل چې FBI د دې پېښې تحقیقات رهبري کوي.
د اوکلینډ کاونټي یو تن پولیس مایک بوچارډ وویل: «دا چې څه شي دا سړی دې عمل ته هڅولی، باید د څېړنو له لارې معلومه شي.»
یو ناپیژانده بریدګر وروسته له هغه ووژل شو چې د میشیګان ایالت د ډېټرویټ ښار په څنډه کې یې یو پکاپ موټر کنیسې ته ننه کړ، چې له امله یې اور لګیدنه رامنځته شوه او د پولیسو پراخ غبرګون یې راوپاراوه. پولیس مایک بوچارډ خبریالانو ته وویل چې امنیتي ساتونکو وروسته له هغه پر بریدګر ډزې وکړې چې هغه د ویسټ بلومفیلډ په «ټیمپل اسرائیل» کنیسه کې له دروازو په زور تېر شو.
بوچارډ د پنجشنبې په ماښام په یوه خبري کنفرانس کې، وویل چې په دې برید کې د کنیسې کارمندانو یا ماشومانو ته زیان نه دی رسېدلی، خو د تخلیې د هڅو پر مهال ۳۰ تنه امنیتي مامورین د لوګي د تنفس له امله روغتون ته وړل شوي دي.
یو یوازینی بریدګر
امنیتي چارواکو تر اوسه په رسمي ډول د برید انګېزه نه ده تایید کړې، خو دا پېښه په داسې حال کې رامنځته کیږي چې د ایران پر وړاندې د امریکا او اسرائیلو د جګړې له پیل وروسته په ټوله امریکا کې امنیتي تدابیر سخت شوي دي. ولسمشر ډونالډ ټرمپ دا برید «وحشتناک» وباله او ویې ویل: «دا واقعا د باور وړ نه ده چې دا ډول پېښې رامنځته کیږي.»
بوچارډ وویل چې بریدګر لومړی د ټیمپل اسرائیل ودانۍ ته موټر ننه کړ او بیا د ودانۍ دننه یوې دهلېز ته ننوت، چې هلته له امنیتي ساتونکو سره مخ شو. پولیس زیاته کړه: «موږ دا مهال نه شو ویلای چې هغه په څه ووژل شو، خو امنیتي کسانو له شکمن سره نښته کړې او ډزې پرې شوې دي.» هغه وویل چې بریدګر په موټر کې یوازې ښکارېده او د پولیسو سپي موټر د چاودېدونکو توکو لپاره چک کوي.
د میشیګان والي ګریټچین ویټمر دا برید وغانده او دا یې یوه «زړه ماتونکې» پېښه وبلله. د سپینې ماڼۍ مطبوعاتي سکرترې کارولین لیویټ وویل چې ولسمشر ټرمپ ته د دې پېښې په اړه معلومات ورکړل شوي دي."
