ولسمشر اردوغان د اسپانیا د لومړي وزیر سانچز سره ټیلیفوني خبرې وکړې

د  تورکیې عامه  اړیکو ریاست ویلي، چې ولسمشر رجب طیب اردوغان د شنبې په ورځ د اسپانیا له لومړي وزیر پیدرو سانچز سره په ټیلیفوني خبرو کې پر دوه اړخیزو اړیکو، سیمه ییزو او نړیوالو پرمختګونو خبرې وکړې.

دواړو مشرانو د  تورکیې  او اسپانیا ترمنځ پر همکاریو د نظر تبادله وکړه او په غزه کې یې پر روان بحران خبرې وکړې.

اردوغان ټینګار وکړ چې د ملګرو ملتونو د عمومي اسامبلې په سږنۍ غونډه کې د فلسطین لپاره د دوه دولتونو د حل لارې د پرمختګ په لور "معنا لرونکي ګامونه" پورته شوي دي.

خو هغه خبرداری ورکړ چې "باید د اسرائیلو د لومړي وزیر بنیامین نتنیاهو د سولې د سبوتاژ کولو مخه ونیول شي"، او ټینګار یې وکړ چې د اسرائیلو کړنې په روښانه توګه ښيي چې د جوړجاړي سره لېوالتیا نه لري.

د  تورکیې  ولسمشر ټینګار وکړ چې تورکیه به په غزه کې د اسرائیلو د تېري د پای ته رسولو او کلابندې شوې سیمې ته د بشري مرستو د بې خنډه رسولو د ډاډمنولو لپاره خپلو هڅو ته دوام ورکړي.

اردوغان همدارنګه د "ګلوبل صمود فلوټیلا" (Global Sumud Flotilla) په اړه د سانچز د دریځ ستاینه وکړه، چې د غزې د کلابندۍ ماتولو لپاره یو ملکي نوښت دی، او یادونه یې وکړه چې ترکیه له نږدې وضعیت څاري.