د ملګرو ملتونو د نړیوال کار سازمان د یوه راپور له مخې، هغه دندې چې دوداً ښځې یې ترسره کوي د مصنوعي ځيرکتيا له اغېزو څخه د نارینه وو دندو په پرتله ډېرې زیانمنې دي، په ځانګړې توګه په لوړ عاید لرونکو هېوادونو کې.
راپور ښيي چې ۹.۶ سلنه هغه دندې چې دوداً ښځې یې ترسره کوي د بدلون سره مخ دي، په داسې حال کې چې یوازې ۳.۵ سلنه د نارینه وو دندې د ورته بدلون سره مخ دي. دا بدلونونه په ځانګړې توګه د اداري چارو او د منشي توب په څېر دندې اغېزمنوي، ځکه چې مصنوعي ځيرکتيا په زیاتېدونکي ډول دا ډول کارونه ترسره کوي.
راپور د سه شنبې په ورځ وویل چې د ډېرو دندو لپاره به د انسان ګډون لا هم اړین وي، او دندې به تر ډېره د بشپړ له منځه تلو پر ځای په بنسټیز ډول بدلې شي.
د رسنیو، سافټویر، او مالي چارو اړوند دندې هم د بدلون په لومړۍ کرښه کې دي، ځکه چې د تولیدي مصنوعي ځيرکتيا زدهکړیزه وړتیاوې پراخېږي.
راپور زیاتوي: "موږ ټینګار کوو چې دا ډول اغېز د یوې بشپړې دندې د سمدستي اتومات کېدو معنا نه لري، بلکې دا ښيي چې د هغې د اوسنیو چارو یوه لویه برخه د دې ټکنالوژۍ په مرسته ترسره کېدای شي."
راپور پر حکومتونو، کارګمارونکو، او په کارګرانو سازمانونو غږ کړی چې په دې اړه فکر وکړي چې څنګه مصنوعي ځيرکتيا د تولید او د دندو د کیفیت د ښهوالي لپاره کارېدلی شي.
