روسیې د اوکراین په پلازمینه کیف د برید سره په لسګونو تنو ته مرګ ژوبله اړولې ده.
د اوکراین د کورنیو چارو وزیر ویلي دي چې د روسیې په یوه برید کې په اوکراین کې لږ تر لږه ۱۴ کسان وژل شوي او لسګونه نور ټپیان شوي دي. هغه ویلي دي چې دا بریدونه د پلازمېنې سربیره په اودیسا او چرنیهیف سیمو هم شوي دي چې پدې سیمو کې هم د ټپیانو راپور ورکړل شوی دی.
د کورنیو چارو وزیر ایګور کلیمینکو د سه شنبې په ورځ په ټیلیګرام کې ولیکل: "د پلازمېنې په بېلابېلو ولسوالیو کې ۲۷ ځایونه د دښمن تر برید لاندې راغلل." هغه زیاته کړه چې "د استوګنې ودانۍ، تعلیمي ادارې او مهمې زیربناوې" ټولې په نښه شوې دي.
د کیف ښاروال ویتالي کلیچکو مخکې راپور ورکړی و چې د پلازمېنې په سولومینسکي ولسوالۍ کې د روسیې په یوه برید کې یو امریکایي وګړی هم وژل شوی دی.
کلیچکو په ټیلیګرام کې وویل: "د کیف په برید کې یو ۶۲ کلن امریکایي وګړی د هغه کور په وړاندې په برید کې چېرته چې ډاکټرانو ټپیانو سره مرسته کوله، وژل شوی دی."
د اوکراین ولسمشر ولادیمیر زیلینسکي د دفتر مشر، اندري یرماک، د کیف په "استوګنېزو ودانیو" باندې د روسیې نوي بریدونه وغندل او په ټیلیګرام کې یې وویل چې مسکو "د ملکي وګړو پر وړاندې خپله جګړه روانه ساتلې ده."
زیلینسکي د دوشنبې په ورځ ویلي وو چې هیله لري د G7 غونډې په څنډه کې له خپل امریکایي سیال ډونالډ ټرمپ سره خبرې وکړي.
خو د امریکا ولسمشر ټرمپ د اسرائیلو او ایران ترمنځه د نښتې له امله مخکې ددینه چې زیلینسکي جي ۷ غونډې ته ورسیږي بیرته واشنګټن ته ستون شو.
بلخوا د روسیې دفاع وزارت ویلي چې په یوه شپه کې یې ۱۴۷ اوکرایني ډرونونه غورځولي دي.
د هوايي دفاع واحدونو د روسیې په خاوره کې، په شمول د مسکو په سیمه کې، ۱۴۷ اوکرایني ډرونونه شنډ او له منځه وړي دي.
د مسکو ښاروال سرګي سوبیانین د سه شنبې په ورځ مخکې ویلي وو چې دوه اوکرایني ډرونونه چې د مسکو پر لور روان وو، په هوا کې له منځه یوړل.
