اوکراین د روسیې په سوچي ښار کې د تیلو په یوې زیرمې د ډرون سره برید وکړ.
د سیمې والي وینیامین کوندراتایف د ټیلیګرام پاڼې له لارې ویلي چې له ۱۲۰ څخه ډیر اور وژونکي هڅه کوي چې د روسیې په سوچي ښار کې د تیلو په یوه زېرمه کې لګیدلی اور مړ کړي چې د اوکراین د بې پيلوټه الوتکې د برید له امله رامنځته شوی.
د روسیې ریا خبري اژانس د یکشنبې په ورځ د بیړنیو حالاتو د چارواکو له قوله وویل، چې د کراسنودار په سیمه کې، چیرې چې سوچي موقعیت لري، یو د تیلو ټانک چې ۲۰۰۰ مکعب متره ظرفیت یې درلود، سوځیدلی دی.
د روسیې د ملکي هوایي چلند ادارې، روساویتسیا، په ټیلیګرام کې وویل چې د هوايي خوندیتوب د یقیني کولو لپاره د سوچي په هوایي ډګر کې الوتنې ودرول شوې دي.
دغه برید، د ساحلي ښار د اډلر په ولسوالۍ شوی. اوکراین پر روسیې دا وروستی برید د مسکو د جګړې لپاره مهم ګڼي.
تیره میاشت د اوکراین د بې پیلوټه الوتکې په یوه برید کې د اډلر په ولسوالۍ کې یو کس وژل شوی و، خو په سوچي باندې بریدونه، چې په ۲۰۱۴ کال کې یې د ژمنیو المپیک لوبو کوربه توب کړی و، د ۲۰۲۲ کال په فبرورۍ کې د پیل شوې جګړې په ترڅ کې کم وو.
د تور سمندر پر غاړه د کراسنودار سیمه د کراسنودار ښار ته نږدې د ایلسکي تېلو تصفیه خانې کوربه ده، چې په سویلي روسیه کې یو له سترو تصفیه خانو څخه ده او د اوکراین د بې پیلوټه الوتکو د بریدونو پرله پسې هدف دی.
همدارنګه د یکشنبې په ورځ، د روسیې د وورونیژ سیمې والي وویل چې د اوکراین د بې پیلوټه الوتکې په یوه برید کې یوه ښځه ټپي شوې چې څو اورونه یې رامنځته کړي، په داسې حال کې چې د اوکراین پلازمینې پوځي ادارې په وینا، روسیې پر کییف د توغندیو برید پیل کړی.
