"د تاوتریخوالي ځواب به په تاوتریخوالي ورکول کېږي": د سعودي د بهرنیو چارو وزیر ایران ته د احتمالي پوځي ځواب اشاره ورکړه

شهزاده فیصل ویلي چې د ډیپلوماټانو د ناستې پر مهال پر ریاض برید ښيي چې ایران "پر ډیپلوماسۍ باور نه لري"؛ هغه پر ملکي ځایونو پرله پسې بریدونه وغندل او د تهران توجیه یې "کمزورې" وبلله.

د سعودي عربستان د بهرنیو چارو وزیر شهزاده فیصل بن فرحان د پنجشنبې په ورځ وویل چې هیواد یې د ایران د پرله پسې توغندیزو او بې پیلوټه الوتکو (ډرون) بریدونو په غبرګون کې پوځي اقدام له پامه نه دی غورځولی.

په ریاض کې د سیمې د هیوادونو د بهرنیو چارو وزیرانو له یوې ناستې وروسته خبریالانو ته په خبرو کې، شهزاده فیصل وویل چې ایران هڅه کوي په خپلو بریدونو سره پر خپلو ګاونډیانو "فشار راوړي".

هغه وویل: "سعودي به فشارونو ته تسلیم نه شي، برعکس دا فشارونه به منفي پایلې ولري... او لکه څنګه چې مو په څرګنده ویلي، موږ که اړتیا ولیدل شي، د پوځي اقداماتو حق د ځان لپاره خوندي ساتلی دی."

سعودي عربستان د چهارشنبې په ورځ د نورو ایراني بریدونو خبر ورکړ، په داسې حال کې چې د بهرنیو چارو وزیر په ریاض کې د نږدې ۱۲ عربي او اسلامي هیوادونو د سیالانو (وزیرانو) کوربه و، ترڅو د منځني ختیځ د جګړې د اغېزو په اړه خبرې وکړي.

د فرانس پریس (AFP) اژانس د خبریالانو په وینا، د چهارشنبې په ورځ په پلازمینه ریاض کې د څو درنو چاودنو غږونه اوریدل شوي، په داسې حال کې چې دفاع وزارت ویلي چې بالستیک توغندي یې شنډ کړي دي.

پر ایران د بریدونو د "سمدستي" بندولو غږ

شهزاده فیصل وویل: "د ډیپلوماټانو د ناستې پر مهال د ریاض په نښه کول... زما په نظر دا تر ټولو روښانه نښه ده چې ایران د ډیپلوماسۍ په اړه څه ډول فکر کوي. هغه له خپل ګاونډیانو سره پر خبرو باور نه لري."

د سعودي د بهرنیو چارو وزیر په خلیج کې د "ملکي ځایونو" پرله پسې په نښه کول وغندل او د ایران دا ادعا یې "کمزورې" وبلله چې ګواکې دوی په سیمه کې د امریکا ګټې په نښه کوي.

هغه وویل: "نه سعودي او نه هم د خلیج هیوادونه به دا ډول باج اخیستل ومني؛ د تاوتریخوالي ځواب به په تاوتریخوالي ورکول کیږي."

په ریاض کې د بهرنیو چارو د وزیرانو په ګډه اعلامیه کې "پر استوګنیزو سیمو او ملکي بنسټونو لکه د تیلو تاسیساتو، د اوبو د تصفیې مرکزونو، هوایي ډګرونو، د اوسیدو ځایونو او ډیپلوماټیکو مرکزونو باندې د بالستیک توغندیو او ډرون الوتکو قصدي کارول" وغندل شول.

په اعلامیه کې زیاته شوې چې وزیرانو "ټینګار وکړ چې دا ډول بریدونه په هیڅ ډول شرایطو کې د توجیه وړ نه دي او د هیوادونو د ځان دفاع حق یې یو ځل بیا تایید کړ." دوی پر ایران غږ وکړ چې "خپل بریدونه سمدستي بند کړي" او د تاوتریخوالي کچه راکمه کړي.