یو چارواکي سي این این ته ویلي چې د امریکا او ایران ترمنځ د کړکېچ کمولو لپاره دا مهال د پردې تر شا ډیپلوماټیکې هڅې روانې دي.
سي این این د جمعې په ورځ د امریکايي چارواکو په حواله راپور ورکړی چې د امریکا او ایران ترمنځ په شخړه کې د تاوتریخوالي کمولو لپاره د پردې تر شا ډیپلوماسي روانه ده.
یو امریکايي چارواکي وویل، امریکا په قصدي ډول بریدونه کوي او بیا یې ځنډوي ترڅو د وضعیت د خرابېدو مخه ونیسي او ډیپلوماسۍ ته لاره هواره کړي. دغه چارواکي زیاته کړه چې امریکا د فشار د وسیلې په توګه د اهدافو یو لیست له ځان سره ساتلی دی.
د راپورونو له مخې، ګڼو چارواکو ویلي چې که اړتیا وه، د جمعې په شپه د احتمالي بریدونو لپاره چمتووالی نیول شوی و، خو اوس مهال ډیپلوماسۍ ته لومړیتوب ورکول کېږي.
نن سهار وختي په عربي سمندر کې د "یو ایس ایس ابراهیم لینکن" الوتکې وړونکې بېړۍ کې، عملې جنګي الوتکې په وسلو سمبال کړې او پیلوټانو د احتمالي بریدونو لپاره تمرینونه ترسره کړل.
د بېړۍ کپتان په بورډ کې زرګونو سرتېرو ته خبر ورکړ چې سیمه ییز کړکېچ مخ په زیاتېدو دی او د چمتووالي پر اهمیت یې ټینګار وکړ، چې دا یو معمول عمل دی.
د بریدونو د چمتووالي ترڅنګ، جنګي پیلوټانو خپلو عادي دفاعي عملیاتو ته دوام ورکړ او د ورځې او شپې لخوا یې الوتنې ترسره کړې.
امریکايي چارواکو وویل چې د ایران هغه ادعاوې ناسمې دي چې ګواکې لا دمخه نور امریکايي بریدونه شوي دي. خو دوی زیاته کړه چې وضعیت د بدلون په حال کې دی او که اړتیا ولیدل شي، بریدونه بیا پیل کېدی شي.
