د هند پوځ د جمعې په سهار وویل چې پاکستان د لویدیځې پولې په اوږدو کې په بېلابېلو ځایونو کې د ډرونونو او نورو وسلو په کارولو سره بریدونه کړي دي.

پوځ زیاته کړه چې دغه برید د پنجشنبې او جمعې ترمنځ شپه ترسره شوی او د پاکستاني ځواکونو لخوا د هند تر ولکې لاندې کشمیر کې د کنټرول کرښې په اوږدو کې د اوربند ګڼې سرغړونې هم شوې دي.

د کنټرول کرښه هغه غیر رسمي پوله ده چې د دواړو سیالانو ترمنځ د شخړه لرونکي هیمالیایي سیمه وېشي.

د پاکستان پوځ دغه تورونه رد کړي او ویلي یې دي چې هند "د جعلي کیسو جوړولو" هڅه کوي.

د پاکستان د پوځ ویاند وویل: "هند وایي چې پاکستان په څو ځایونو بریدونه کړي؛ دا یوازې یوه خیالي کیسه ده چې پرې خندلای شئ."

هغه زیاته کړه: "هغوی په ۱۸مه پېړۍ کې ژوند کوي که په ۲۱مه پېړۍ کې، ځکه هر توغندۍ یو ډیجیټل نښه او لاسلیک پرېږدي؟"

کشمیر

د پولیسو په وینا، په پاکستان تر ولکې لاندې کشمیر کې د هند د شپې په ډزو کې پنځه ملکي وګړي وژل شوي، وروسته له هغې چې د دواړو اټومي وسلو لرونکو ګاونډیانو ترمنځ څو ورځې نښتې شوې.

د کوټلي ولسوالۍ یو پولیس چارواکي عدیل خان د فرانس پریس خبري اژانس ته وویل: "هندي ځواکونو په ملکي سیمو ډزې وکړې، چې په پایله کې پنځه کسان، په شمول د یوې دوه کلنې نجلۍ، ووژل شول او دولس نور ټپیان شول." هغه زیاته کړه چې ډزې تر ناوخته پورې روانې وې.

دغه مرګ ژوبله د مظفرآباد په سیمه کې د یو لوړپوړي حکومتي چارواکي لخوا تایید شوې ده.

هغه وویل: "په ځواب کې، د پاکستان پوځ یو قوي متقابل برید وکړ او د کنټرول کرښې (LoC) په اوږدو کې يې درې هندي پوستې په نښه کړې."

د چارواکو په وینا، لږ تر لږه ۱۶ کسان د کنټرول کرښې په اوږدو کې د هند تر ولکې لاندې کشمیر کې وژل شوي دي.

هند په شمال کې د مې تر ۱۰مې پورې ۲۷ هوایي ډګرونه تړلي دي، د دولتي خپرونې ډي ډي نیوز راپور ورکړی. دغه خپرونه زیاتوي چې شاوخوا ۴۳۰ ملکي الوتنې لغوه شوې دي.

د هند او پاکستان ترمنځ کړکېچ دا اونۍ هغه وخت زیات شو کله چې هند د سې شنبې په شپه ناوخته د "عملیات سندور" اعلان وکړ او ویې ویل چې په پاکستان کې یې په نهو ځایونو بریدونه کړي دي.

د پاکستان پوځ ویلي چې د هند د توغندیو بریدونو او د پولې پورې غاړې ډزو په پاکستان تر ولکې لاندې کشمیر کې ۳۱ کسان وژلي دي.