ایران له امریکا سره هر ډول خبرې او مذاکرات رد کړل
د ایران د ملي امنیت د عالي شورا منشي، علي لاریجاني هغه راپورونه رد کړل چې ګواکې تهران له واشنګټن سره د خبرو اترو د بیا پیلولو په هڅه کې دی.
علي لاریجاني د دوشنبې په ورځ دا ادعاګانې رد کړې چې تهران له واشنګټن سره د مذاکراتو د بیا پیلولو غوښتنه کړې او اعلان یې وکړ چې ایران به له متحده ایالاتو سره په هیڅ ډول خبرو کې برخه وانخلي.
لاریجاني پر ایکس (پخواني ټویټر) ټولنیزه شبکه کې هغو راپورونو ته ځواب ووایه چې ګواکې ایران له امریکا سره د خبرو لپاره نوي نوښتونه کړي دي. هغه د الجزیرې هغه راپور ته په اشارې چې له وال سټریټ ژورنال څخه یې اخیستل شوی و او ادعا یې کوله چې لاریجاني د عمان له لارې له واشنګټن سره د خبرو هڅه کړې، وویل: "موږ به له امریکا سره مذاکره ونه کړو."
په یوه بل پوسټ کې، لاریجاني د ایران په اړه د امریکا د ولسمشر ډونالډ ټرمپ څرګندونو ته هم غبرګون وښود. نوموړي پر ټرمپ نیوکه وکړه چې په "خالي خیالونو" یې سیمه ګډوډۍ ته بیولې او زیاته یې کړه: "هغه اوس د امریکایي سرتېرو د نورو زیانونو په اړه اندېښمن دی. هغه په خپلو وهمونو سره د 'لومړی امریکا' شعار په 'لومړی اسرائیل' بدل کړی او امریکایي سرتېري یې د اسرائیل د قدرت غوښتنې قرباني کړي دي."
هغه په دوام کې ټرمپ تورن کړ چې "امریکایي سرتېري او د هغوی کورنۍ په نویو درواغو سره د دې کار بیه ورکولو ته مجبوروي."
د امریکا او اسرائیل ګډ پوځي عملیات چې د شنبې په ورځ پیل شول، د ایران د ستر رهبر علي خامنه يي په ګډون څو لوړپوړي ایراني چارواکي وژلي دي. تهران د دې کار په غبرګون کې پر خلیجي هېوادونو د ډرون او توغندیو بریدونه کړي، چې په پایله کې یې درې امریکایي سرتېري وژل شوي او پنځه نور سخت ټپیان دي.
