د ځايي رسنیو د راپورونو له مخې، لږ تر لږه اووه کسان د جنوبي هند په یوه کرکټ لوبغالي کې د ګڼې ګوڼې له امله مړه شوي او ۲۵ نور ټپیان شوي دي.

دغه پېښه د چهارشنبې په ورځ هغه مهال رامنځته شوه کله چې زرګونه کرکټ مینه‌وال د بنګلور ښار په ایم. چیناسوامي لوبغالي کې د هند د پریمیر لیګ د ګټونکو د لمانځنې لپاره راټول شوي وو. د هند پریمیر لیګ د نړۍ تر ټولو مشهور شل اوریز کرکټ ټورنمنټ ګڼل کېږي.

د ځايي ټلویزیوني چینلونو په خپرو شویو ویډیوګانو کې لیدل کېږي چې پولیس ټپیان او بې‌هوښه شوي کسان امبولانسونو ته انتقالوي.

تر اوسه د چارواکو له خوا په دې اړه کوم رسمي نظر نه دی ورکړل شوی.