چین ویلي چې د ولسمشر شي جین پینګ، د روسیې ولسمشر ولادیمیر پوتین او د امریکا ولسمشر ډونالډ ټرمپ ترمنځ د یوې احتمالي سرمشریزې په اړه تماسونه دوام لري. دا په داسې حال کې ده چې یوه ورځ وړاندې کرملین وویل چې د دې غونډې د جوړولو لپاره کار روان دی.

د چین د بهرنیو چارو وزارت ویاندې ماو نینګ د چهارشنبې په ورځ په بیجینګ کې خبریالانو ته وویل: "چین د چین، روسیې او متحده ایالاتو د مشرانو د غونډې په اړه له اړوندو خواوو سره د تماس په حال کې دی."

په بیجینګ کې د میشت ګلوبل ټایمز  په وینا، ماو د فایننشل ټایمز هغه راپور ته غبرګون ښود، چې پکې ویل شوي وو د دریو واړو هیوادونو چارواکي د نوامبر په ۱۸-۱۹ نېټه د سویل ختیځ چین په شینزین کې د آسیا-پاسفیک اقتصادي همکارۍ (APEC) سرمشریزې په څنډه کې د یوې غونډې په اړه بحث کوي. ټاکل شوې چې ښاغلی شي د اپیک د ۲۱ غړو هیوادونو د مشرانو او استازو کوربه توب وکړي.

د کرملین ویاند دیمتري پیسکوف فایننشل ټایمز ته وویل: "د دا ډول غونډې د جوړولو لپاره کار روان دی."

دغې ورځپاڼې د سه شنبې په ورځ راپور ورکړ چې چین لا تر اوسه پریکړه نه ده کړې چې دا کار پرمخ یوسي که نه. راپور زیاته کړې چې دا څرګنده نه ده چې ایا د دریو واړو هیوادونو چارواکي په ګډه خبرې کوي او که بیجینګ له واشنګټن او مسکو سره جلا جلا خبرې کوي.

ورځپاڼې راپور ورکړی: "له خبرو اترو څخه خبر یوه کس وویل چې واشنګټن او مسکو پر چین فشار راوړي ترڅو غونډې ته غاړه کیږدي."

پوتین او ویټکوف د احتمالي سرمشریزې په اړه خبرې کړې

د کرملین سلاکار یوري اوشاکوف وویل چې پوتین او د امریکا ځانګړي استازي سټیو ویټکوف د اکټوبر په ۲۱مه په سینټ پیټرزبرګ کې د خبرو پر مهال د یوې درې اړخیزې غونډې د احتمال په اړه بحث وکړ.

اوشاکوف وویل چې دې مفکورې "دومره ډیره نړیواله پاملرنه راجلب کړې" او هیڅ یوه اړخ یې شونتیا نه ده رد کړې. د دوشنبې په ورځ، پیسکوف وویل چې په اپیک کې د پوتین د مهال ویش جوړول لاهم روان دي.

هر مشر له نورو دوو سره په دوه اړخیزو خبرو کې لیدلي دي، خو درې واړو هیڅکله ګډه سرمشریزه نه ده کړې. دا غونډه به د شي، پوتین او ټرمپ ترمنځ لومړنۍ درې اړخیزه سرمشریزه وي.

شي او ټرمپ سږ کال دوه ځله لیدلي دي، چې وروستۍ لیدنه یې په سپتمبر کې سپینې ماڼۍ ته د شي د سفر پر مهال وه.

پوتین د می په میاشت کې په بیجینګ کې له شي سره ولیدل، په داسې حال کې چې ټرمپ او پوتین وروستی ځل د ۲۰۲۵ کال په اګست کې په الاسکا کې مخامخ لیدلي وو.

زیلینسکي د یوې نوې یالتا (Yalta) په اړه خبرداری ورکوي

د اوکراین ولسمشر ولادیمیر زیلینسکي تېره میاشت خبرداری ورکړ چې دا وړاندیز شوې سرمشریزه کولی شي مسکو ته "بل لوی ډیپلوماټیک امتیاز" ورکړي.

هغه د ۱۹۴۵ کال هغې سرمشریزې ته په اشارې سره چې پکې د شوروي، امریکا او بریتانیا مشرانو له جګړې وروسته د نړۍ د نظم په اړه بحث وکړ، وویل: "موږ واقعاً نه غواړو چې دا په 'یالتا ۲، ۳، ۴' بدله شي، چیرې چې د نفوذ بیا ویش ترسره کیږي."

زیلینسکي وویل: "روسیه تر بل هر چا ډیره دا غونډه غواړي."