ادعا شوې چې ایران واشنګټن ته خبر ورکړی چې که متحده ایالات خپله سمندري محاصره پای ته ورسوي او ډیپلوماسۍ ته بېرته راستون شي، تهران چمتو دی چې د ۷ ورځو په ترڅ کې د هرمز تنګی بېرته پرانیزي.
د جاپان له «کیودو» خبري اژانس سره په خبرو کې یوه ناپېژندل شوي ایراني دولتي چارواکي ویلي چې دا وړاندیز د منځګړو له لارې امریکا ته رسول شوی او ترڅنګ یې د دواړو هېوادونو ترمنځ د تلپاتې اوربند د ټینګښت په موخه د خبرو اترو د بېرته پیلولو طرحه وړاندې شوې ده.
د ملګرو ملتونو د عمومي اسامبلې په جریان کې له ایراني ولسمشر مسعود پزشکیان سره د امریکا د ولسمشر ډونالډ ترامپ د لیدنې غوښتنې ته په اشارې سره، دغه ایراني چارواکي وویل چې له ترامپ سره د مستقیمې لیدنې هېڅ احتمال نشته، خو د دواړو هېوادونو ترمنځ د یوه توافق پر سر د پرمختګ چانس شته.
چارواکي زیاته کړه: «سیستمي توافق ته د رسېدو امکان شته، خو د ډیپلوماسۍ د پرمختګ لپاره واشنګټن باید له ځانه جديت او پرېکړنده والی وښيي.»
د ایراني چارواکي د څرګندونو له مخې، تهران تمه لري چې واشنګټن بېرته خبرو اترو ته راستون شي او پر ایران لګول شوې سمندري محاصره ختمه کړي. که دا ګامونه پورته شي، ایران چمتو دی چې د ۷ ورځو په ترڅ کې د هرمز ستراتیژیکه تنګې بېرته پرانیزي او د خبرو اترو مېز ته کښېني.
د ایران د ملي امنیت د عالي شورا سرمنشي محسن رضایي د سپټمبر پر ۱۹مه په خپله وینا کې ویلي و چې تهران د جګړې د ختمولو او مذاکراتو د بېرته پیل لپاره واشنګټن ته ۷ شرطونه وړاندې کړي دي.
رضایي وویل: «د جګړې د پای ته رسولو لپاره د ایران د شرطونو منل د امریکا په ګټه دي. موږ بشپړې جګړې ته بشپړ چمتووالی لرو.»
