مالي، بورکینا فاسو او نایجر د جرمونو له نړیوالې محکمې له غړیتوب څخه د وتلو خبرداری ورکړ.
د مالي، بورکینا فاسو او نایجر حکومتونو ویلي، چې دا درې واړه هېوادونه د جرمونو له نړیوالې محکمې څخه وځي او پر دغې نړیوالې محکمې یې د "انتخابي عدالت" تور پورې کړی دی.
د جرمونو نړیواله محکمه (ICC)، چې مرکز یې په هاګ کې دی، د جنګي جرمونو، بشریت ضد جرمونو او نسل وژنې لپاره د نړۍ دایمي نړیواله محکمه ده.
له کودتاګانو وروسته، د دغو درېیو هېوادونو پوځي مشرانو خپل اوږدمهاله ملګري، د لوېدیځ او د لوېدیځې افریقا د سیمه ییزې ټلوالې په ګډون، پرېښي دي.
'د نوي استعمار وسیله'
دوی نوې ټلوالې جوړې کړې دي، په ځانګړې توګه له روسیې سره، چې ولسمشر یې ولادیمیر پوتین په اوکراین کې د روسیې د جګړې له امله د جرمونو د نړیوالې محکمې له خوا د نیولو له حکم سره مخ دی.
د دوشنبې په ورځ ناوخته په یوه ګډه اعلامیه کې چې د خپل وتلو اعلان یې کاوه، دغو درېیو هېوادونو وویل چې د جرمونو نړیواله محکمه "د امپریالیزم په لاس کې د نوي استعماري جبر یوه وسیله" ګرځېدلې ده، خو د دغه تور په اړه یې نور جزئیات نه دي ورکړي.
دغو هېوادونو دا هم وویل چې دوی د لا ډېر "حاکمیت" په لټه کې دي او د دې محکمې لپاره یې یوه ځایي بدیل ته هم اشاره وکړه.
د جرمونو له نړیوالې محکمې څخه د وتلو بهیر لږ تر لږه یو کال وخت نیسي ترڅو بشپړ شي.
د روان کال په پیل کې، هنګري هم له دې محکمې څخه د خپل وتلو اعلان کړی و.
