ایران خبرداری ورکړ چې که امریکا پر ملکي زیربناو بریدونه وکړي، د تېلو او ګازو عرضه به ګډوډه کړي
سپاه پاسداران خبرداری ورکوي چې ځوابي برید به د سیمې په کچه او هاخوا د امریکا او د هغې د شریکانو د انرژۍ ګټې په نښه کړي.
ایران خبرداری ورکړی چې که امریکا متحده ایالات د دغه هېواد پر ملکي زیربناوو بریدونه وکړي، دوی کولای شي په سیمه کې "د کلونو لپاره" د تېلو او ګازو عرضه ګډوډه کړي.
د ایران د دولتي خبري اژانس (ارنا) په یوه راپور کې راغلي چې د ایران د اسلامي انقلاب ساتندویه ځواک (سپاه پاسداران) د سه شنبې په ورځ ویلي، که د دوی په وینا "سرې کرښې" تر پښو لاندې شي، نو دوی به له سیمې بهر هم ځوابي عمل وکړي.
سپاه پاسداران ګواښ وکړ: "موږ به د امریکا او د هغې د شریکانو زیربناوې زیانمنې کړو، چې دا به متحده ایالات او د هغې متحدین د کلونو لپاره په سیمه کې له تېلو او ګازو بې برخې کړي."
دغه ځواک ویلي چې ایران تر اوسه په خپلو غبرګونونو کې د ښه ګاونډیتوب د ملاحظاتو په پام کې نیولو سره له زغمه کار اخیستی دی.
هغوی زیاته کړه: "خو اوس ممکن دا ټول ملاحظات لغوه شي."
په بیان کې ټینګار شوی چې ایران پر ملکي اهدافو بریدونه نه دي پیل کړي، خو د خپلو ملکي زیربناوو پر وړاندې د بریدونو ځواب به ورکړي.
دا غوښتنه وروسته له هغه وشوه چې د امریکا ولسمشر ډونالډ ټرمپ ګواښ وکړ که تهران د هرمز تنګي په بېرته پرانیستلو او یوې هوکړې ته په رسېدو کې د سه شنبې د شپې تر ۸ بجو (د امریکا ختیځ وخت) پورې پاتې راشي، نو په ټول ایران کې به د برېښنا مرکزونه او پلونه بمبار کړي.
سیمه ییزه ترینګلتیا له هغه وخت راهیسې په شدت سره روانه ده چې کله اسرائیلو او امریکا د فبرورۍ په ۲۸مه پر ایران بریدونه پیل کړل. په دغو بریدونو کې د ایران د هغه وخت د ستر مذهبي مشر علي خامنه يي په ګډون له ۱۳۴۰ څخه ډېر کسان وژل شوي دي. ایراني چارواکو په وروستیو ورځو کې د مرګ ژوبلې شمېرې نه دي تازه کړې.
تهران په ځواب کې پر اسرائیل، اردن، عراق او د خلیج په هغو هیوادونو کې چې د امریکا پوځي اډې پکې دي، د ډرون او توغندیو بریدونه کړي، چې د مرګ ژوبلې او زیربناوو ته د زیان رسولو ترڅنګ یې نړیوال بازارونه او هوايي چلند هم له ستونزو سره مخ کړي دي.