سلوانیا پر اسرائیلو د هر ډول وسلو پر صادراتو او وارداتو بندیز ولګو. دا د اروپايي تولنې لومړنی غړی دی چې داسې زړور ګام اوچتوي.
د سلوانیا حکومت په وار وار د اسرائیلو پر کړنو نیوکې کړې دي او تېر کال یې د فلسطین د دولت په رسمیت پېژندلو اقدام وکړ، ترڅو د غزې جګړه ژر تر ژره پای ته ورسوي.
د سلوانیا حکومت د پنجشنبې په شپه په یوه بیان کې وویل: "سلوانیا د اروپا لومړنی هېواد دی چې له اسرائیلو سره د وسلو په وارداتو، صادراتو او ترانزیت بندیز لګوي."
په بیان کې راغلي چې دا اقدام په خپلواکه توګه ترسره کېږي ځکه چې د اروپایي اتحادیې غړي هېوادونه د داخلي اختلافاتو او بې اتفاقۍ له امله د مشخصو اقداماتو په ترسره کولو کې پاتې راغلي دي.
د غزې په ویجاړونکې جګړه کې، چېرته چې "خلک په سیسټماتیک ډول سره د بشري مرستو د نه لاسرسي له امله مري،" دا د هر مسؤل دولت دنده ده چې اقدام وکړي، حتی که دا د نورو هېوادونو څخه مخکې ګام اخیستل وي،"
حکومت زیاته کړې چې د ۲۰۲۳ کال د اکتوبر راهیسې یې اسرائیلو ته د پوځي وسلو او تجهیزاتو د صادراتو لپاره هیڅ اجازه نه ده ورکړې.
د جولای په لومړیو کې، سلوانیا د اروپایي اتحادیې په کچه لومړی هیواد وو چې پر دوه افراطي اسرائیلي وزیرانو بندیز ولګو او خپل هیواد ته ممنوع الدخول اعلان کړل.
دوی دواړه اسراییلیان "نامطلوب شخصیتونه" اعلان کړل او تور یې پرې ولګاوه چې د فلسطینیانو پر وړاندې د "شدید تاوتریخوالي او د بشري حقونو د جدي سرغړونو" هڅونه کوي او "د نسل وژنې څرګندونې" کوي.
د ۲۰۲۴ کال په جون کې، د سلوانیا پارلمان د فلسطین د دولت په رسمیت پېژندلو پرېکړه تصویب کړه، چې دا د ایرلنډ، ناروې او اسپانیا په لاره روان شو. دا اقدام د اسرائیلو له خوا د غزې پر دوامداره بمبارۍ د نړیوالو نیوکو په ترڅ کې ترسره شو چې د ۲۰۲۳ کال د اکتوبر له ۷مې وروسته پیل شوې وه.
