د اسټرالیا حکومت د سپین پوستو د برترۍ شبکې ټیرورګرام د ترهګرې ډلې په ليست کې شامله کړه.
د کورنیو چارو وزیر ټوني برک وایي چې داسې افراطي کرکه په اسټرالیا کې ځای نه لري.
هغه په ټولنیزه شبکه ایکس کې وویل: "دغه ډله داسې نظریه خپروي چې غواړي ځینې اسټرالیایان په خپل کور کې نا آرامه کړي. دا افراطي کرکه دلته د منلو وړ نه ده او په اسټرالیا کې ځای نه لري."
د SBS نیوز د راپور له مخې، د دې ډلې په لیست کې شاملېدل دا معنا لري چې که څوک د دې ډلې غړی یا ورسره تړاو ولري، نو تر ۲۵ کلونو پورې د بند سزا ورکول کېدای شي.
برک زیاته کړه: "دا لیست کول به د اسټرالیا حکومت ته د دې توان ورکړي چې په هېواد کې د افراطیانو فعالیتونه محدود کړي او د اسټرالیایانو امنیت به خوندي کړي."
د روان کال په لومړیو کې، د اسټرالیا حکومت پر ټیرورګرام بندیزونه ولګول، چې دا لومړی ځل و چې کانبیرا په بشپړ ډول پر یوې آنلاین ډلې د ترهګرۍ مالي بندیزونه ولګول.
ټیرورګرام یوه آنلاین شبکه ده چې په ځانګړي ډول د ټیلیګرام پیغام رسونې اپلیکیشن له لارې فعالیت کوي او د نوې فاشیزم، سپین پوستو د برترۍ او وسله وال افراطي نظریاتو ملاتړ کوي.
د بریتانیا د کورنیو چارو وزارت په وینا، دغه ډله د لویدیځې نړۍ د ړنګېدو او د نژادي جګړې د رامنځته کولو لپاره د ترهګریزو بریدونو له لارې هڅې کوي.
بریتانیا ټیرورګرام په اپرېل ۲۰۲۴ کې د ترهګرې ډلې په توګه وپېژندله.
ږترلږه دوه بریدونه د ټیرګرم سره تړاو لري: د تیر کال په اګست کې په ژوندۍ بڼه خپور شوی برید چې پکې یو ۱۸ کلن ځوان په ترکیه کې د یوه جومات بهر پنځه کسان په چاقو ووهل، او په ۲۰۲۲ کال کې د اکتوبر په میاشت کې د سلواکیا په پلازمېنه براتیسلاوا کې په یوه بار کې د دوو کسانو وژل.
