ولادیمیر پوتین په ولادیوستوک ښار کې د ۱۱مې ختیځې اقتصادي غونډې (فورم) په عمومي ناسته کې ګډون وکړ.
پوتین په دې فورم کې د وینا پر مهال دې ته اشاره وکړه چې امریکا به د اوکراین د کړکېچ له حل وروسته له روسیې سره پر اړیکو تمرکز وکړي او زیاته یې کړه:
"روسیه او اوکراین باید په خپلو کې یوې هوکړې ته ورسېږي. امریکا او چین په ګډون نور هېوادونه د دې پروسې ملاتړ ته چمتو دي. په پای کې باید ستونزه د جګړې د خواوو ترمنځ حل شي، چې دا خواوې روسیه او اوکراین دي. موږ باور لرو چې دا یو سم لیدلوری دی. له ټولو هغو کسانو مننه کوو چې د دې مسئلې په حل کې مرسته کوي. ایا د حل لپاره کوم چانس شته؟ زما په فکر هو، شته."
پوتین د اوکراین ولسمشر ولودیمیر زیلینسکي تورن کړ چې د روسیې ملکي هوانوردۍ (هوايي چلند) ته یې ګواښ کړی او ویې ویل: "دا د دولتي تروریزم څرګندونه ده. دا چاره د سولې د خبرو اترو ترسره کول ستونزمنوي. د اوکراین هغه لوېدیځ متحدین چې په دې اړه چوپ پاتې دي، هغوی د نړیوال تروریزم شریکان دي."
ولادیمیر پوتین دا هم وویل چې د استخباراتي ادارو له لارې له اوکرایني لوري سره اړیکې دوام لري.
روسي مشر په خپل هېواد کې د تېلو (سون توکو) د ستونزې په اړه وویل: "موږ باید هر څه ته چمتو واوسو."
پوتین د تېرې میاشتې هغې پېښې ته په اشارې سره چې په لایپزیګ-هالي هوايي ډګر کې یو چاودېدونکی ډرون موندل شوی و او له امله یې جرمني په بون ښار کې د روسیې قونسلګرۍ د تړلو پرېکړه وکړه، وویل: "جرمني د خپلو ډارونو (فوبیا) له امله روسي او جرمني اتباع له قونسلي او کلتوري خدمتونو بې برخې کړل. په برلین کې زموږ سفارت به د ویزو، پاسپورټونو او نوټري چارو مسوولیت پر غاړه واخلي."
