نه سپینې ماڼۍ او نه د نتنیاهو دفتر د دې ټلیفوني اړیکې په اړه کوم بیان خپور کړی دی.
د اسرائیلو ۱۲م چینل د چهارشنبې په ورځ راپور ورکړ چې د امریکا ولسمشر ډونالډ ټرمپ او د اسرائیلو لومړي وزیر بنیامین نتنیاهو تېره شپه یوه «اوږده او ډراماتیکه» ټلیفوني اړیکه درلوده؛ دا په تېرو څو ورځو کې د دواړو مشرانو ترمنځ دویمه اړیکه ده.
د خبرو اترو د محتوا په اړه جزییات نه دي ورکړل شوي، خو یاد چینل دا خبرې اترې «اوږدې او ډراماتیکې» بللې دي.
یادې رسنۍ ویلي چې دا اړیکه په داسې حال کې شوې چې داسې ښکاري دواړه مشران د ایران د جګړې په اړه «د یوې پرېکړې په درشل کې» دي. سپینې ماڼۍ او د نتنیاهو دفتر تر اوسه د دې اړیکې په اړه رسمي اعلامیه نه ده خپره کړې.
د یکشنبې په ورځ هم نتنیاهو او ټرمپ له ۳۰ دقیقو څخه زیاتې خبرې کړې وې چې د اسرائیلي رسنیو په وینا، تمرکز یې «په ایران کې د جګړې د بیا پیلولو پر احتمال» و.
«وخت مخ په ختمېدو دی»
له دغې اړیکې وروسته، ټرمپ په خپله ټولنیزه پاڼه (Truth Social) کې ایران ته خبرداری ورکړ چې د دوی لپاره «وخت مخ په ختمېدو دی.
د دوشنبې په ماښام ټرمپ اعلان وکړ چې د سعودي عربستان، قطر او متحده عربي اماراتو په غوښتنه یې هغه برید ځنډولی چې ټاکل شوې وه د سه شنبې په ورځ پر ایران ترسره شي. هغه په یو پوسټ کې زیاته کړه چې دفاع وزارت ته یې لارښوونه کړې ترڅو «په هغه صورت کې چې کومه د منلو وړ معامله ونشي، په هره شېبه کې پر ایران د یو بشپړ او پراخ برید لپاره چمتو واوسي.»
د پاکستان په منځګړیتوب د ځنډېدلو خبرو اترو وروسته، امریکا د اپریل له ۱۳مې راهیسې د ایران پر بندرونو، په ځانګړې توګه د هرمز ستراتیژیک تنګي ته څېرمه، محاصره لګولې ده.
ایران په ځواب کې دا تنګی تړلی او کښتیو ته یې امر کړی چې د تېرېدو لپاره له تهران سره همغږي وکړي. دا اندېښنې په داسې حال کې زیاتې شوي چې د اپریل له ۸مې راهیسې نافذ شوی ماتېدونکی اوربند ښايي د یوې نوي هوکړې په نشتوالي کې له منځه لاړ شي او هغه جګړه بیا پیل شي چې د فبرورۍ په میاشت کې پیل شوې وه.
