پوټین دا څرګندونې د هند په پلازمینه نوي ډیلي کې د برېکس (BRICS) ۱۸مې مشرانو غونډې په څنډه کې خبریالانو ته وکړې .
نوموړي د جرمني د ساکسوني-انهالټ (Saxony-Anhalt) ایالتي پارلمان په ټاکنو کې د "لمان لپاره بدیل " ګوند بریا ته په اشارې وویل: «زما په آند هغه څه چې اوس مهال په اروپا کې رامنځته کېږي؛ په اساسي توګه د هغه قشر... د لوېدیځو ګلوبالیستانو (جهاني پالو) د سیاسي، امنیتي او اقتصادي سیسټمیکو تېروتنو پایله ده چې 'لوېدیځ' بلل کېږي.»
پوټین دې ته په اشارې چې د روسیې په ګډون هرڅوک تېروتنې کوي، وویل خو لوېدیځ ګلوبالیستان د سړې جګړې له پای ته رسېدو او د شوروي اتحاد له شیندل کېدو وروسته «په لوړه کچه کې احساس شول، دا انګېرنه یې درلوده چې هر څه جواز لري او دوی هیڅ تېروتنه نه کوي.»
پوټین په دې ټینګار وکړ چې لوېدیځ تل هڅه کړې چې روسیه «تر فشار لاندې راولي» او زیاته یې کړه: «دوئ غوښتل په پیل کې دا کار د قفقاز په سیمه کې د تروریستانو او جلا غوښتونکو له لارې وکړي. او اوس دا هڅه د اوکراین د نازي ادارې له لارې کوي. دوئ غوښتل روسیه پارچه پارچه کړي. دا یو روښانه حقیقت دی.»
پوټین د اوکراین بحران ته په اشارې وویل چې دا شخړه د لوېدیځ لخوا پارول شوې، ځکه د دوئ موخه په ناټو کې د اوکراین شاملول وو: «دا په اوکراین کې د نننیو غمجنو پېښو اصلي علت و. لوېدیځ ګلوبالیستان په دې اړه پړه دي، خو دوئ تل دا ملامتي زموږ پر غاړه اچوي.»
ولادیمیر پوټین دا هم یادونه وکړه چې اروپا له روسیې څخه د طبیعي ګازو له اخیستلو په شا شوه او اوس مهال یې له بېلابېلو سرچینو په خورا لوړه بیه تامینوي.
نوموړي په اوکراین کې د اروپايي پوځي ځواکونو د ځای پر ځای کېدو د احتمال په اړه وویل: «اوس مهال هغوی (لوېدیځې نخبې) د اوکراین خاورې ته د پوځیانو په استولو غور کوي. دا له روسیې سره د جګړې پيل دی. زما تر درکه د اروپايي هېوادونو اتباع له دې واقعیت خبر دي. زما په باور په جرمني کې د ټاکنو پایلې او په ټولیزه توګه په اروپا کې د سیاسي پروسو جرړې په همدې پورې تړلې دي.»
