د تورکیې د بهرنیو چارو وزارت ویاند اونجو کیچیلي پر ایکس (پخواني ټویټر) لیکلي: "په نړیوالو اوبو کې د ګلوبل صمود د کښتیو پر وړاندې د اسرائیلي ځواکونو د غیرقانوني مداخلې په پایله کې، زموږ نیول شوي اتباع او نور ګډونوال د (یونان) کرېت ټاپو کې ښکته شوي دي."
هغه زیاته کړه: "په اټن کې زموږ سفیر او کونسلي کارکوونکي په کرېت کې حضور لري. زموږ اتباع او د نورو هېوادونو یو شمېر فعالان به نن د یوې چارتر (ځانګړې) الوتکې په واسطه تورکیې ته انتقال شي."
د "ګلوبل صمود" کاروان پر حکومتونو غږ کړی چې پر اسرائیلو فشار راوړي ترڅو پاتې نیول شوي کسان خوشې کړي. دغې ډلې په یو بیان کې ویلي چې ډېری فعالان په کرېت کې خوشې شوي، خو دوه کسان چې او سیف نومېږي، لا هم د اسرائیلو په بند کې دي. دغه کاروان ویلي: "موږ له ټولو حکومتونو غواړو چې پر اسرائیلي رژیم فشار راوړي ترڅو ټول غیرقانوني تښتول شوي کسان خوشې کړي."
د پنجشنبې په ورځ، د اسرائیل د بهرنیو چارو وزارت وویل چې په نړیوالو اوبو کې یې د غزې په لور د روانو ۲۰ کښتیو له نیولو وروسته، ۱۷۵ فعالان نیولي دي.
د دغه کاروان هدف د غزې د سمندري کلابندۍ ماتول او د بشري مرستو لپاره د یوې سمندري لارې پرانیستل دي. دا د ګلوبل صمود کاروان دویمه هڅه ده؛ لومړۍ هڅه یې د ۲۰۲۵ کال په سپټمبر کې کړې وه چې هغه مهال هم په نړیوالو اوبو کې د اسراییلو له خوا د کښتیو د نیول کېدو او د سلګونو فعالانو د توقیف لامل شوې وه.
اسرائیلو د ۲۰۲۳ کال په اکتوبر کې پر غزې "نسل وژونکې" جګړه پیل کړه چې تر اوسه پکې له ۷۲ زرو ډېر فلسطینیان وژل شوي، چې ډېری یې ښځې او ماشومان دي. دغې جګړې د غزې ۹۰ سلنه بنسټیزې زیربناوې ویجاړې کړې دي، چې ملګرو ملتونو یې د بیارغونې لګښت شاوخوا ۷۰ میلیارده ډالره اټکل کړی دی. اسرائیلو له ۲۰۰۷ کال راهیسې پر غزې سخته کلابندي لګولې
