یو روسي چارواکي د دوشنبې په ورځ وویل چې اوکراین د روسیې تر ولکې لاندې د لوهانسک په سیمه کې د "بیلوریچینسکا" (Bilorichenska) د سکرو پر کان برید کړی، چې له امله یې د برېښنا یو سب سټیشن زیانمن شوی او ۴۱ کان کیندونکې تر ځمکې لاندې بند پاتې دي.
د دغې سیمې د کرملین ملاتړي مشر، لیونید پاسچنیک، د دوشنبې په ورځ وویل چې بېړنۍ ډلې د برېښنا پر بېرته فعالولو او د کان کیندونکو پر خوندي ایستلو بوختې دي.
پاسچنیک وویل: "اړونده ادارې د کان ایستونکو د ژغورلو لپاره ګامونه پورته کوي." هغه زیاته کړه چې له هغوی سره اړیکه ټینګه شوې او کارګران د څښاک اوبو ته لاسرسی لري.
دا پېښه پر ملکي تاسیساتو د مخ په زیاتېدونکو خطرونو څرګندونه کوي، په داسې حال کې چې په ختیځ اوکراین کې جګړه په شدت سره روانه ده.
د اوکراین د بریدونو زیاتوالی
پر دغه کان دا برید په داسې حال کې کېږي چې تر دې ۲۴ ساعته لږ مخکې اوکراین د روسیې د بالټیک سمندرګي "پریمورسک" بندر او د "نورسي" (NORSI) د تېلو چاڼ ځای په نښه کړي وو.
اوکراین په تېره میاشت کې د روسیې د انرژۍ پر بنسټونو او تاسیساتو خپل بریدونه خورا ګړندي کړي دي.
