د بنګله دېش په عمومي ټاکنو کې ملیتپالو ګوند بي این پي (BNP) دوه پر درې برخه اکثریت ترلاسه کړ
د ټاکنو د کمېسیون د رسمي پایلو له مخې، د بنګله دېش ملتپال ګوند او متحدینو یې ۲۱۲ څوکۍ او د جماعت اسلامي ګوند په مشرۍ بلاک ۷۷ څوکۍ ګټلې دي.
رسمي چارواکو اعلان کړی چې د بنګله دېش ملتپال ګوند (BNP) د هېواد د پنجشنبې ورځې د عمومي ټاکنو ګټونکی دی. د ټاکنو د کمېسیون جګپوړي سکرتر، اختر احمد د جمعې په ورځ په پلازمېنه ډاکه کې خبریالانو ته وویل چې بي این پي ۲۰۹ څوکۍ ګټلې دي، چې په دې سره یې د پارلمان په ۳۰۰ څوکیو کې دوه پر درې برخه اکثریت ترلاسه کړ.
احمد وویل چې جماعت اسلامي ۶۸ څوکۍ ګټلې او له خپلو نورو ۱۰ متحدینو سره یوځای د نوي پارلمان په پایلو کې ۷۷ څوکۍ لري. دا د شیخ حسینې له دورې وروسته په هېواد کې لومړنۍ ټاکنې وې. بي این پي او متحدینو یې په مجموع کې ۲۱۲ څوکۍ ترلاسه کړې دي. خو جماعت اسلامي د رایو د شمېرلو پر پروسې پوښتنې راپورته کړې او ګواښ یې کړی چې که بې نظمیو ته پام ونه شي، لاریونونه به وکړي.
سوله ییزې ټاکنې
دا په ۲۰۲۴ کال کې د هغه ولسي پاڅون وروسته چې د شیخ حسینې حکومت یې وپرځاوه، لومړنۍ عمومي ټاکنې وې. د ټاکنو کمېسیون وویل چې په دریو څوکیو ټاکنې وځنډول شوې. د شیخ حسینې "عوامي لیګ" ګوند په ټاکنو کې له ګډون څخه منع شوی و او د هغې پخواني متحد "جاتیا ګوند" یوه څوکۍ هم ونه ګټله. اته نورې څوکۍ خپلواکو کاندیدانو او کوچنیو ګوندونو ګټلې دي.
د بنګله دېش د ټاکنو د کمېسیون په وینا، د رایې ورکولو کچه ۵۹.۴۴ سلنه وه، چې د ۲۰۲۴ کال د جنوري د ټاکنو په پرتله (۴۱.۸ سلنه) د پام وړ زیاتوالی ښيي.
د اصلاحاتو ریفرنډم (عامه پوښتنه)
د ټاکنو ترڅنګ خلکو په یوه ریفرنډم کې هم برخه واخیسته ترڅو د "جولای منشور" په نوم د اصلاحاتو طرحه تایید یا رد کړي. د ټاکنو کمېسیون وايي چې دا منشور په غوڅ اکثریت تایید شو او له ۴۸ ملیونو څخه زیاتو خلکو ورته "هو" وویل.
په دې منشور کې د حکومتولۍ د سمون لپاره له ۸۰ څخه ډېر وړاندیزونه شامل دي، لکه د لومړي وزیر د دورې محدودول، د ولسمشر د واکونو پراخول، د قضایه قوې د خپلواکۍ ساتل او د ښځو د استازولۍ زیاتول. نوی ټاکل شوی پارلمان مکلف دی چې دا اصلاحات د ۱۸۰ کاري ورځو په ترڅ کې پلي کړي.
د ملګرو ملتونو د معلوماتو له مخې، په ۲۰۲۴ کال کې د شیخ حسینې د حکومت د پرځولو پر مهال په لاریونونو کې تر ۱۴۰۰ پورې کسان وژل شوي وو. تېر نومبر، شیخ حسینه د پاڅون پر مهال د بشریت ضد جرمونو په تور په غیاب کې په اعدام محکومه شوه.
