افغانستان او پاکستان ترمنځ د مذاکراتو دریم پړاو سبا پنجشنبه په استانبول کې پیلیږي.
افغانستان او پاکستان ترمنځ د نښتو نه وروسته د اوربند د جزیاتو په اړه د خبرو اترو بل پړاو به د پنجشنبې په ورځ په تورکیه کې ترسره شي، چې مشري به یې د دواړو هېوادونو د استخباراتو مشران کوي.
د افغانستان ملي راډیو تلویزیون لخوا په ټولنیزه شبکه کې د خپاره شوي بیان له مخې، د افغانستان او پاکستان ترمنځ د خبرو اترو د دریم پړاو په موخه افغانستان هیئت تورکیې ته روان شو.
د دواړو هیوادونو د پلاوو مشري به د افغانستان د استخباراتو رئیس عبدالحق وثیق او د پاکستان د استخباراتو مشر عاصم ملک پر غاړه ولري.
د پاکستان د بهرنیو چارو وزارت ویاند، طاهر حسین اندرابي، اعلان کړی و چې د دواړو هیوادونو ترمنځ د اوربند د جزیاتو په اړه به په استانبول کې خبرې اترې د نوامبر په شپږمه دوام ومومي.
د افغانستان او پاکستان ترمنځ د نښتو وروسته، د اکتوبر په ۱۵مه د ۴۸ ساعتونو لپاره اوربند اعلان شو. دا اوربند وروسته د تورکیې او قطر په ملاتړ د قطر په پلازمینه دوحه کې د خبرو اترو تر پایه پورې وغځول شو.
د دوحې په خبرو کې، د ولسمشر رجب طیب اردوغان په لارښوونه، د تورکیې د ملي استخباراتو (MİT) مشر ابراهیم قالن هم ګډون کړی و.
د خبرو اترو اصلي موضوع "د اوسني اوربند غځول او د وروستیو نښتو حل کول" وو، او دواړو خواوو په دې اړه هوکړه کړې وه.
په دوحه کې له ۱۴ ساعته خبرو اترو وروسته پریکړه وشوه چې د اوربند د جزیاتو د څیړلو لپاره به د تخنیکي کمیټې لومړۍ غونډه په استانبول کې جوړه شي.
د پاکستاني رسنیو د راپورونو له مخې، د پاکستان او افغانستان پلاوو د همدې موخې لپاره د اکتوبر په ۲۵مه په استانبول کې سره ولیدل.
همداشان پدې غونډه کې بیا د نوامبر په شپږمه د مذاکراتو د دریم پړاو د ترسره کولو په اړه موافقه وشوه.
