د صمود بېړیو پر کاروان د اسرائیل له برید وروسته په ایټالیا کې دوهمه ورځ هم سختې مظاهرې روانې دي او د سراسري کاربندیز امکان شته

په روم، میلان او نورو ښارونو کې زرګونه کسانو لاریونونه کړي، او کارګرو ټولنو غزې ته د مرستو له فعالانو سره د پیوستون لپاره د سراسري کاربندیز غوښتنه کړې ده.

په ټوله ایټالیا کې زرګونه کسان له یوه پلان شوي سراسري کاربندیز یوه ورځ مخکې، غزې ته له تلونکي مرستندویه کاروان څخه د ملاتړ لپاره واټونو ته راووتل، په داسې حال کې چې حکومت په غزه کې د اسرائیل د کلابندۍ ماتولو پر هڅې خپله نیوکه بیا تکرار کړه.

په روم کې، پولیسو وویل چې شاوخوا ۱۰،۰۰۰ کسانو له کولوسیوم څخه د ښار مرکز ته لاریون وکړ او د لومړۍ وزیرې جیورجیا میلوني له خوا د اسرائیل د ملاتړ پر ضد یې شعارونه ورکول.

مظاهرې میلان، تورینو، فلورېنس او بولونیا ته هم وغځېدې.

د روم د ښاري شورا یوه غړي، لورېنزو جیاردینیتي، چې په لاریون کې یې ګډون کړی و، وویل: "د بېړیو کاروان په یو ډول دې مسئلې ته بیا پام را اړولی او هغه وجدانونه یې راویښ کړي چې ښایي د دوو کلونو جګړې او عام وژنې وروسته ډېر ویده پاتې وو."

هغه زیاته کړه: "نن کولوسیوم دی، سبا عمومي کاربندیز دی... دا د دې خبره ده چې موږ خپل ځانونه مخې ته کړو، لکه څنګه چې د بېړیو فعالانو وکړل."

په میلان کې، اټکل ۵۰۰۰ کسان د ډومومو کلیسا ته نږدې راټول شول او د ګڼې ګوڼې پر مهال یې ترافیک بند کړل.

لاریون کوونکو چیغې وهلې: "موږ چمتو یو چې هر څه بند کړو. د نسل وژنې ماشین باید همدا اوس ودرول شي."

د ریل چلونکې ادارې 'ټرېن اېټالیا' تایید کړه چې په فلورېنس او بولونیا کې وروسته له هغې چې مظاهره کوونکو د ریل پټلۍ ونیولې، د اورګاډو تګ راتګ وځنډول شو.

کاربندیز او نیونې

د USB په مشرۍ ایټالوي کارګرو ټولنو د جمعې په ورځ د عمومي کاربندیز غوښتنه وکړه.

یادې ټولنې وویل: "اسرائیل له نړیوالو قوانینو سرغړونه کوي. دا د هر څه د بندولو وخت دی."

د پنجشنبې په ورځ، میلوني وویل چې اسرائیل د بېړیو له کاروان څخه ۴۰ ایټالویان نیولي دي.

هغې خبریالانو ته وویل: "البته، موږ به هر څه وکړو ترڅو ډاډ ترلاسه کړو چې دا خلک ژر تر ژره ایټالیا ته راستانه شي."

خو هغې زیاته کړه: "زه لا هم په دې باور یم چې دا هر څه د فلسطین خلکو ته هېڅ ګټه نه رسوي."

د بهرنیو چارو وزیر انتونیو تایاني پارلمان ته وویل چې د بېړیو د کاروان ټول غړي به د راتلونکې اونۍ په پیل کې په تل ابیب کې د بن ګوریون هوايي ډګر ته ولېږدول شي، او بیا به د اروپا پلازمېنو ته ولېږل شي.

هغه یادونه وکړه چې "د اسرائیلي ځواکونو له خوا په ترسره شویو عملیاتو کې هېڅ ډول تاوتریخوالی یا ستونزې نه دي ثبت شوي."

د ایټالیا د پارلمان دوه غړي او د اروپايي پارلمان دوه ایټالوي غړي هم د "ګلوبل صمود" په نوم د بېړیو په کاروان کې سپاره وو، چې تنظیموونکي یې وايي په نړیوالو اوبو کې پرې غیر قانوني برید شوی.

میلوني، چې د یوه سخت دریځه ښي اړخي ائتلاف مشري کوي، مخکې هم د بېړیو کاروان یو "خطرناک او غیر مسؤلانه" اقدام بللی و.

د سه‌شنبې په ورځ، هغې پر کاروان غږ وکړ چې خپل حرکت ودروي، ترڅو د امریکا د ولسمشر ډونالډ ټرمپ هغه پلان له خطر سره مخ نه کړي چې په غزه کې د اسرائیل جګړه پای ته رسوي.