د حکومتي پوځي چارواکو او د حوثي مېشتو سیمو د راپورونو له مخې، د تېرې پنجشنبې راهیسې د یمن د حوثیانو او حکومتي ځواکونو ترمنځ په نښتو کې ۸۱ وسله وال وژل شوي دي.
د سرې بحیرې په ساحلي سیمه کې یوه پوځي چارواکي ویلي چې د دوی ۲۴ سرتېري وژل شوي، په داسې حال کې چې په تعز سیمه کې یوه بل چارواکي د ۱۵ سرتېرو د وژل کېدو خبر ورکړی دی. د حوثیانو تر کنټرول لاندې سیمو کې روغتیايي سرچینو ویلي چې لږ تر لږه ۴۲ حوثي وسله وال هم وژل شوي دي.
دا جګړې د پنجشنبې په ورځ وروسته له هغه پیل شوې چې حوثي ځواکونو د سرې بحیرې ساحلونو او تعز ته نږدې د راکټي او بې پیلوټه الوتکو (ډرون) په ملاتړ ځمکني بریدونه وکړل.
حکومتي پوځي سرچینو "ای ایف پي" خبري اژانس ته ویلي چې حوثیان غواړي د "مخا" کلیدي بندري ښار له نورو حکومتي سیمو څخه جلا کړي. دا ښار له څو اونیو راهیسې د بریدونو لاندې دی. سرچینې زیاتوي چې حوثیان همدارنګه هڅه کوي د "باب المندب" ستراتیژیک تنګي ته نږدې سیمو ته پرمختګ وکړي.
د جګړې بیا پیلېدل او د یمن بې ثباتي
یمن له یوې لسیزې څخه زیات وخت راهیسې د ایران پلوه حوثیانو او د سعودي عربستان په مشرۍ د ائتلاف له خوا د ملاتړ کېدونکي حکومت ترمنځ په کورنۍ جګړه کې ښکېل دی.
دا تازه نښتې د یمن ثبات یو ځل بیا له ګواښ سره مخ کوي؛ هغه هېواد چې د ۲۰۲۲ کال اوربند پکې د جګړې شدت یو څه راکم کړی و. دا نښتې د سرې بحیرې په شاوخوا سیمو کې متمرکزې دي، چې د نړۍ د سوداګرۍ لپاره یو له خورا مهمو سمندري لارو څخه ګڼل کېږي.
د وژل شویو کسانو یاد شوي ارقام تر اوسه د خپلواکو سرچینو له خوا په رسمي ډول نه دي تایید شوي.
