تېره اونۍ نوو افشاګریو وښودله چې انډریو د بریتانیا د سوداګرۍ د ځانګړي استازي په توګه د دندې پر مهال، په جنسي جرمونو محکوم شوي جیفري اپسټین ته احتمالي محرم اسناد لیږلي وو.

د بریتانیا پولیسو ویلي چې د دغه هېواد پخوانی شهزاده، انډریو ماونټ بیټن-وینډسور، د سوداګرۍ د استازي په توګه د دندې پر مهال د ناوړه چلند او له واک څخه د ناسمې ګټې اخیستنې په شک نیول شوی دی.

د پولیسو ځواکونو د پنجشنبې په ورځ په رسمي ډول د هغه نوم وانخیست، ځکه چې دا د بریتانیا په قانون کې یو عادي امر دی. خو کله چې ترې وپوښتل شول چې ایا هغه نیول شوی، پولیسو یوې بیانیې ته اشاره وکړه چې پکې راغلي وو دوی یو شپېته کلن سړی نیولی دی.

د "تیمز ویلي" (Thames Valley) پولیسو په خپله اعلامیه کې وویل: «د څېړنو په لړ کې، موږ نن (۱۹/۲) د نورفولک سیمې یو شپېته کلن سړی په عامه دفتر کې د ناوړه چلند په شک نیولی دی.» په اعلامیه کې زیاته شوې چې تر بشپړې ارزونې وروسته یې د دې تور په اړه رسمي پلټنې پیل کړې دي.

پولیسو دا هم وویل چې له نیول کېدو وروسته، افسرانو د انګلستان په ختیځ او د لندن په لوېدیځ کې دوه ځایونه پلټلي دي.

تېره اونۍ داسې نوي اسناد راڅرګند شول چې ښيي انډریو د بریتانیا د سوداګریز استازي په توګه د کار پر مهال، جیفري اپسټین ته حساس او محرم اسناد لیږلي وو. جیفري اپسټین یو امریکایی میلیاردر و چې په جنسي جرمونو محکوم شوی و.