د بلجیم د دفاع وزیر روسیه وګواښله: که توغندي مو وتوغول، مسکو به له نقشې ورک کړو

د بلجیم د دفاع وزیر، تیو فرانکن، روسیې ته سخت خبرداری ورکړی او ویلي یې دي چې که روسیه پر بروکسل توغندیز برید وکړي، نو د ناټو له لوري به له پرېکنده ځواب سره مخ شي.

فرانکن د دوشنبې په ورځ "ډي مورګن" ورځپاڼې ته وویل: "که د روسیې ولسمشر ولادیمیر پوتین پر بروکسل توغندی وتوغوي، موږ به مسکو د نړۍ له نقشې څخه ورک کړو." هغه د ناټو پر ډله‌ییزې دفاعي ژمنې ټینګار وکړ.

هغه د ولسمشر ډونالډ ټرمپ تر مشرۍ لاندې ناټو ته د امریکا د ژمنتیا په اړه شکونه رد کړل او ویې ویل: "په اروپا کې د امریکا د حکومت پر وړاندې ډېر تعصب شتون لري. د نه باور وړ خبره ده... هغه په رښتیا سره وویل چې امریکا به سل په سلو کې د ناټو له متحدینو ملاتړ ته دوام ورکړي. پر بروکسل کروز توغندی؟ دا یوه نا ممکنه خبره ده، که له هر تعریف څخه کار واخلئ. پوتین به دا کار ونه کړي."

خو هغه د روسیې د پوځي وړتیاوو د کم ارزونې پر وړاندې خبرداری ورکړ.

هغه وویل: "روسانو خپل پوځي وړتیاوې لوړې کړې دي. د دوی جنګي اقتصاد د ټولې ناټو په پرتله څلور چنده ډېر مهمات تولیدوي. اروپا حتی یو مرکزي قومانداني هم نه لري."

هغه په اوکراین کې د روسیې ستونزو ته هم اشاره وکړه او ویې ویل: "ځکه چې دوی د ټول لوېدیځ پر وړاندې جنګیږي! اوکراینیان زموږ په وسلو، مهماتو او پیسو جنګیږي. که نه نو، دوی به ډېر پخوا له منځه تللي وو."

چین غواړي جګړه اوږده شي

فرانکن د راتلونکي په اړه وویل چې د لوېدیځ پر وړاندې د روسیې او چین د ګډې ننګونې احتمال شته.

هغه وویل: "چین غواړي چې په اوکراین کې جګړه اوږده شي، ځکه چې دا لوېدیځ کمزوری کوي. دوی په لویه کچه د روسیې خام مواد اخلي، وسلې ورکوي، او ډېر خوښ دي چې پوتین د شمالي کوریا سرتېري ځای پر ځای کوي."

هغه زیاته کړه: "زه د بالټیک پر هېوادونو د روسیې لوی برید لږ احتمالي ګڼم. ځکه چې دا هېوادونه د ناټو غړي دي. ډېر ژر به موږ په اروپا کې شپږ سوه F-35 الوتکې ولرو: روسان له دوی څخه وېرېږي، ځکه چې دوی یې نه شي لیدلی."