د امریکا ولسمشر ډونالډ ټرمپ د پنځه میلیون ډالري ( ټرمپ کارت ) ویزې لپاره په رسمي توګه انټرنټ پاڼه پرانیسته.
ولسمشر ډونالډ ټرمپ د خپل پلان شوي ۵ میلیونه ډالري د امریکا د استوګنې ویزې لپاره د یوې نوې ویبپاڼې اعلان وکړ، چې د دې ځانګړې ویزې لپاره د انتظار لیست په TrumpCard.gov کې پرانیستل شوی دی.
ټرمپ د چهارشنبې په ورځ په یوه ټولنیز پوسټ کې ولیکل: "زرګونه خلک زنګونه وهي او پوښتنه کوي چې څنګه د دې ښکلي فرصت لپاره نوم لیکنه وکړي ترڅو د نړۍ تر ټولو ستر هېواد او بازار ته لاسرسی ومومي."
ټرمپ د اپرېل په میاشت کې د Air Force One په الوتکه کې د دې ځانګړې ویزې لومړنۍ بڼه وړاندې کړه، چې د سرو زرو یوه نمونه یې په لاس کې نیولې وه چې د هغه انځور پرې جوړ شوی و. هغه ژمنه وکړه چې دا ځانګړې ویزه به "په لږ وخت کې، شاید دوه اونیو کې" چمتو شي.
که څه هم ویزې لا تر اوسه نه دي چمتو شوې، خو د چهارشنبې په ورځ پرانیستل شوې ویبپاڼه خلکو ته اجازه ورکوي چې خپل نوم، غوښتل شوې ویزه او بریښنالیک آدرس د ټرمپ کارت "The Trump Card is Coming" تر سرلیک لاندې ثبت کړي.
ټرمپ مخکې ویلي و چې دا نوې ویزه، چې د دودیزې شنه کارت یوه لوړه بیه لرونکې بڼه ده، به د کار جوړونکي راجلب کړي او د امریکا ملي پور کمولو لپاره به وکارول شي.
دا اعلان په داسې حال کې شوی چې په ټول هېواد کې د کډوالو د شړلو عملیات زیات شوي، چې مظاهرې یې پارولې دي، او د ټرمپ اداره د مهاجرت ضد اقداماتو له امله د شکایتونو او د حقونو د سرغړونو تورونو سره مخ ده. ټرمپ ویلي چې دا نوې کارت به د امریکا د تابعیت ترلاسه کولو لپاره یو ارزښتناک لاره وي.
هغه د فبرورۍ په میاشت کې وویل چې د هغه اداره هیله لري چې "شاید یو میلیون" دا کارتونه وپلوري او دا یې هم رد نه کړه چې ممکن روسي میلیاردران هم د دې لپاره وړ وي.
