د غزې په خوشې شویو بندیانو د ستړیا او په وجود کې د ټپونو نښې ښکاره شوي . دې د زندان د شرایطو او د بندیانو سره د چلند په اړه اندیښنې لا زیاتې کړي دي.
د سیمه ییزو سرچینو په وینا، اسرائیلو د یکشنبې په ورځ د غزې څخه ۱۵ فلسطینی بندیان د جنوب د کریم شالوم د لارې خوشې کړل، چې ډیری یې کمزوري ښکاریدل او ځینو یې ښکاره ټپونه درلودل.
دا خوشې کول په داسې حال کې ترسره کېږي چې اسرائیل لا هم د تېرو دوو کلونو په موده کې له غزې څخه نیول شوي زرګونه فلسطینیان بندیان ساتلي دي. د بشري حقونو ډلو او مستند شواهدو تایید کړې چې بندیان په هغو مرکزونو کې ساتل کېږي چې د بشري معیارونو لږ تر لږه شرایط نه لري او هلته له شکنجې، لوږې، او طبي بې پروايۍ سره مخامخ کېږي.
د بندیانو د رسنیو دفتر، چې یوه نادولتي اداره ده، په یوه لنډ بیان کې وویل چې دغه ۱۵ بندیان د کرم شالوم له پولې انتقال شوي او د نړیوال سره صلیب کمېټې په ملتیا د مرکزي غزې د دیر البلح ښار د الاقصی شهیدانو روغتون ته روان وو.
بیان د هغوی د روغتیايي حالت په اړه نور جزئیات نه دي ورکړي.
خو شاهدانو انادولو ته ویلي چې خوشې شوي بندیان ډېر کمزوري او ستړي ښکارېدل، او پر ځینو یې د ټپونو نښې لیدل کېدې.
د رسمي فلسطیني شمېرو له مخې، اوس مهال له ۹۶۰۰ څخه ډېر فلسطینیان د اسرائیلو په زندانونو کې بندیان دي، چې پکې ۹۰ ښځې او ۳۵۰ ماشومان شامل دي.
په غزه کې د امریکا په ملاتړ د اوربند تړون د اکتوبر له ۱۰مې راهیسې نافذ دی، چې د اسرائیلو دوه کلنه جګړه یې درولې ده؛ په دې موده کې د ۲۰۲۳ کال د اکتوبر راهیسې له ۷۲,۰۰۰ څخه ډېر کسان، چې ډېری یې ښځې او ماشومان دي، وژل شوي او له ۱۷۲,۰۰۰ څخه ډېر نور ټپیان شوي دي.
