افغانستان: د پاکستاني پلاوي غیر معقولو غوښتنو خبرې اترې له خنډ سره مخ کړې
د افغانستان د بهرنیو چارو وزارت امیرخان متقي ادعا وکړه چې د کابل او اسلام اباد ترمنځ د خبرو د ناکامۍ اصلي لامل د پاکستاني پلاوي "غیر معقول او نه پلي کېدونکې غوښتنې" وې.
متقي په یوه غونډه کې د پاکستان سره د شویو خبرو په اړه څرګندونې وکړې.
متقي په استانبول کې جوړو شویو غونډو ته په اشارې وویل: "پاکستاني استازو د مذاکراتو پر مهال داسې غوښتنې وړاندې کړې چې نه د پلي کېدو وړ وې او نه هم معقولې. د هغوی یوه غوښتنه دا وه چې 'موږ ته تضمین راکړئ چې په پاکستان کې به بیا امنیتي پېښه نه رامنځته کیږي.'"
متقي څرګنده کړه چې افغانستان غواړي له پاکستان سره د متقابل احترام پر بنسټ دوستانه اړیکې ولري، خو ویې ویل چې د خپلې ځمکنۍ بشپړتیا ساتنې ته به دوام ورکړي.
متقي دا ادعا هم وکړه چې پاکستان پر افغانستان د فشار راوړلو لپاره سوداګریزې لارې تړلې دي.
د پاکستان او افغانستان ترمنځ نښتو وروسته د اکتوبر په ۱۵مه اعلان شوی ۴۸ ساعته اوربند، د تورکیې او قطر په ملاتړ د قطر په پلازمېنه دوحه کې د دواړو لورو ترمنځ د مذاکراتو تر پایه وغځول شو.
د ولسمشر رجب طیب اردوغان په لارښوونه، د استخباراتو د ملي ادارې (MİT) مشر ابراهیم کالن هم د دوحې په خبرو کې ګډون کړی و.
د خبرو اترو اصلي موضوع "د اوسني اوربند غځول او د وروستیو پوله ییزو نښتو حل کول" وو او دواړو خواوو هوکړه کړې وه.
په دوحه کې له ۱۴ ساعته مذاکراتو وروسته پرېکړه وشوه چې د اوربند د جزئیاتو د څېړلو لپاره به تخنیکي کمیټه خپله لومړۍ غونډه په استانبول کې ترسره کوي.
د پاکستان او افغانستان پلاوي د اکتوبر په ۲۵مه په همدې موخه په استانبول کې سره راټول شول، او د غونډې لومړی پړاو د اکتوبر په ۳۰مه د بیا کتنې په پرېکړې سره پای ته ورسېد.
د پاکستان د دفاع وزیر خواجه محمد اصف هم د نومبر په ۷مه اعلان وکړ چې د پاکستان او افغانستان ترمنځ مذاکرات بې پایلې پاتې شوي او ځنډول شوي دي.
