یو امنیتي چارواکی: د پاکستان په بلوچستان ایالت کې د بېلتون غوښتونکو په بریدونو کې تر ۲۵۰ ډېر کسان وژل شوي

یو امنیتي چارواکي د چهارشنبې په ورځ وویل، د شنبې له ورځې راهیسې د پاکستان په بلوچستان ایالت کې د بېلتون غوښتونکو له خوا په همغږي بریدونو کې تر ۲۵۰ ډېر کسان وژل شوي دي، او جګړه لا هم روانه ده ځکه چې حکومتي ځواکونه وسله وال تعقیبوي.

پاکستان له لسیزو راهیسې د بلوڅ بېلتون غوښتونکو له بغاوت سره مبارزه کوي، او په دغه کانونو بډایه ایالت کې چې له افغانستان او ایران سره پوله لري، په پرله پسې توګه پر امنیتي ځواکونو، بهرنیو وګړو او غیر ځايي پاکستانیانو وسله وال بریدونه کېږي.

یوه جګپوړي چارواکي، چې د نوم نه ښودلو په شرط یې خبرې کولې، د چهارشنبې په ورځ اې اېف پي ته وویل چې "د ترهګرۍ ضد روانو عملیاتو کې ۱۹۷ ترهګر وژل شوي دي."

هغه زیاته کړه چې په ناارامه بلوچستان کې د دغو همغږي بریدونو پر مهال لږ تر لږه ۳۶ ملکي وګړي او ۲۲ امنیتي پرسونل وژل شوي دي.

وروسته له هغې چې وسله والو د اونۍ په پای کې پر بانکونو، زندانونو، د پولیسو پر مرکزونو او پوځي تاسیساتو بریدونه وکړل، په ځینو ولسوالیو کې لا هم کله ناکله نښتې روانې وې.

د بلوچستان اعلی وزیر، سرفراز بګټي، د یکشنبې په ورځ په کوټه کې یوې خبري غونډې ته وویل چې تر برید لاندې ټولې ولسوالۍ پاکې شوې دي.

هغه وویل: "موږ دوی تعقیبوو، موږ به یې دومره په اسانۍ پرېنږدو."

د بلوڅو ازادي بخښونکې اردو (بي اېل اې)، چې د دغه ایالت تر ټولو فعاله بېلتون غوښتونکې وسله واله ډله ده، اې اېف پي ته په یوه استول شوې خبرپاڼه کې د دغو بریدونو مسؤلیت منلی دی.

دې ډلې، چې امریکا لخوا  یوه ترهګریزه ډله نومول شوې، ویلي چې دوی په وسله والو او ځانمرګو بریدونو کې پوځي تاسیسات، پولیس او د ملکي ادارې چارواکي په نښه کړي دي.

بي اېل اې په وروستیو کلونو کې په سیمه کې پر کارکوونکو د نورو ایالتونو پر پاکستانیانو او همدارنګه پر بهرنیو د انرژۍ شرکتونو خپل بریدونه زیات کړي دي.

تېر کال، بېلتون غوښتونکو پر یوه اورګاډي برید وکړ چې ۴۵۰ مسافر په کې سپاره وو، چې له امله یې دوه ورځنۍ خونړۍ محاصره رامنځته شوه.

ملګرو ملتونو د سې شنبې په ورځ دا وروستي بریدونه "ناوړه او بزدلانه" وبلل.