په چین کې د زیږون کچه له ۱۹۴۹ کال راهیسې تر ټولو ټیټې کچې ته راښکته شوې ده
وروستي معلومات ښیي چې تیر کال د زیږون کچه په هرو ۱۰۰۰ کسانو کې ۵.۶ ته راټیټه شوې، چې د نویو زیږیدلو ماشومانو شمیر ۷.۹ میلیون ته راټیټ شوی.
د راپور له مخې، د چین د زېږون کچه په ۱۹۴۹ کال کې د خلکو د جمهوریت له تاسیس راهیسې تر ټولو ټیټې کچې ته رسېدلې ده.
بلومبرګ د دوشنبې په ورځ راپور ورکړ چې د ملي احصایې ادارې لخوا خپاره شوي رسمي معلومات ښیې چې تیر کال د زیږون کچه په هرو ۱۰۰۰کسانو کې ۵.۶ ته راټیټه شوې، او د نويو زېږېدلو ماشومانو ټول شمېر ۷.۹ میلیونو ته کم شوی — چې د ۱.۶ میلیونو په اندازه یو تیز کمښت او له ۲۰۲۰ کال راهیسې تر ټولو لوی سقوط بلل کېږي.
دغه کمښت د چین ټول نفوس ۳.۴ میلیونه راکم کړ، چې دا پرلهپسې څلورم کالنی کموالی دی.
دې شمېرو د ولسمشر شي جین پینګ تر مشرۍ لاندې د بېجینګ د «زېږون دوست» ټولنې هڅو ته ضربه ورسوله، سره له دې چې چارواکي نغدي مرستې، د والدینو د رخصتۍ غځول او نور تشویقي امتیازات پلي کوي.
چین همدارنګه په ۲۰۲۴ کال کې د ۱۹۸۰ کال راهیسې د ودونو تر ټولو ټیټ شمېر ثبت کړ، چې یوازې ۶.۱ میلیونه جوړو واده وکړ — دا د ۲۰۲۳ کال په پرتله ۲۰.۵ سلنه کمښت ښيي — په داسې حال کې چې د طلاق کچه ۱.۱ سلنه لوړه شوې ده.
د هېواد د نفوس فشارونه لا پسې ژور شول، ځکه چې د زېږون ټیټې کچې دوام وکړ؛ دا چاره د ماشوم زیږولو د عمر د ښځو د کمښت، او همدارنګه د ټولنیزو او اقتصادي فشارونو له امله د ځوانو نسلونو ترمنځ د واده او والدینو کېدو د ځنډ له کبله رامنځته شوې ده.
بېجینګ د واده او زېږون د کچو د کمېدو د مخنیوي لپاره تګلارې پلي کړې دي، خو تر اوسه یې د پام وړ اغېزې نه دي ښودلې.
د چین نفوس په ۲۰۲۴ کال کې ۱.۴ میلیاردو ته رسېدلی، چې دا له ۲۰۲۱ کال راهیسې پرلهپسې درېیم کلنی کموالی ښيي.
د چین اقتصاد
په عین حال کې، د رسمي معلوماتو له مخې، د چین اقتصاد په ۲۰۲۵ کال کې ۵ سلنه وده کړې، چې د حکومت د کلنۍ ودې هدف یې پوره کړ، دا معلومات د دوشنبې په ورځ خپاره شول.
د ملي احصایې ادارې لهخوا خپرو شوو شمېرو له مخې، د هېواد ناخالص کورني تولید (GDP) د ۱۴۰ ټریلیون یوانو (شاوخوا ۲۰ ټریلیون ډالرو) له ریکارډ کچې واوښت.
د نړۍ دوهم لوی اقتصاد وکولای شول چې د حکومت له ټاکلي نږدې ۵ سلنه ودې هدف سره سم پرمختګ ترلاسه کړي، سره له دې چې له کمزوري کورني تقاضا، د انفلاسیون ضد تمایلاتو، د املاکو په سکتور کې له اوږدمهاله رکود، او د امریکا د تعرفو له پالیسیو سره تړلو بهرنیو بې باوریو څخه رامنځته شویو فشارونو سره مخ و.
