د ډیموکراټ ګوند مشر یایر ګولان د ټولنیزو رسنیو پلیټ فارم ایکس کې په یوه پوسټ کې ویلي چې "دا د اسرائیلو لپاره یو سخت سهار ده".
ګولان لیکلي: «اسرائیلي وګړي نن سهار د امریکا او ایران ترمنځ د یوې داسې هوکړې په خبر راویښ شول چې د اسرائیلو له پامه غورځولو سره ترسره شوې ده.»
هغه استدلال وکړ چې، "د یو واحد لاسلیک سره"، د متحده ایالاتو ولسمشر ډونالډ ټرمپ یو تړون لاسلیک کړ چې په مؤثره توګه ایران ته د ژغورنې لاره برابره کړه، پداسې حال کې چې نتنیاهو "په څنګ کې ولاړ، بې واکه، ناروغ، منزوي او بې اغیزې" پاتې شو.
ګولان دغه وضعیت د کلونو ناکامۍ پایله وبلله او ویې ویل: «نتنیاهو د اسرائیلو په تاریخ کې د تر ټولو سترې ستراتیژیکې ناکامۍ پلار شوی.»
هغه د اسرائیلو لومړی وزیر نتنیاهو تورن کړ چې د اسرائیلو ائتلافونو ته یې زیان رسولی او هيواد یې په یوه حساس پړاو کې منزوي پرېښی دی.
ګولان زیاته کړه: "نتنیاهو د حماس، ایران او حزب الله لپاره ښه دی. خو د اسرائیلو لپاره ښه نه دی. د هغه ځای ناستی موندل یوازې یوه سیاسي اړتیا نه ده، بلکې د بقا او امنیت لپاره یوه حیاتي اړتیا ده."
'نتنیاهو باور له لاسه ورکړی دی'
د اپوزیسیون یاشر ګوند مشر او د اسرائیلو د پوځ پخوانی لوی درستیز، ګادي ایزنکوټ هم په ایکس کې په خپره شوې یوه اعلامیه کې پر دې تړون نیوکه کړې، چې د امریکا او ایران تړون یې "د اسرائیلو د ګټو خلاف" وباله.
ایزنکوټ وویل چې نتنیاهو د اسرائیلو د خلکو او د هیواد د متحدینو دواړو باور له لاسه ورکړی دی. د هغه په وینا، لومړې وزیر د خلکو سره په مستقیم ډول د خبرو اترو توان نه درلود او اسرائیلیان د بهرنیو مشرانو د بیانونو له لارې د دې تړون په اړه خبر شول.
'یوه ستراتیژیکه ناکامي'
د اپوزیسیون نیلي او سپین ګوند مشر بیني ګانټز په ایکس کې وویل چې په هیڅ حالت کې اسرائیل باید په لبنان کې د خپل پوځي شتون محدودیتونه یا له هغه څخه وتل ونه مني.
ګانټز استدلال وکړ چې د امریکا او ایران هوکړه ښايي یوه ستراتیژیکه ناکامي وي چې اسرائیل به د کلونو لپاره په سیاسي، نظامي او حقوقي شخړو کې ښکيل شي.
د نتنیاهو د کابینې څو غړو هم د دې تړون په اړه قوي اعتراضونه څرګند کړي دي.
د ښي اړخي مالیې وزیر بیزلیل سموتریچ د واشنګټن او تهران ترمنځ دغه هوکړه "د اسرائیلو لپاره بد خبر" وبله.
د دفاع وزیر، یسرایل کاټز ویلي چې د دې هوکړې له هر ډول پایلو سره سره به اسرائیلي پوځ په هغو سیمو کې چې اوس یې تر کنټرول لاندې لري—په جنوبي لبنان، سوریه او غزه—خپل پوځي حضور ته دوام ورکړي.
د ملي امنیت وزیر اتمر بین ګویر هم د تړون په اړه په کلکه غبرګون وښود او ويې ويل:
"د ټرمپ تړون موږ نه تړي. اسرائیل د متحده ایالاتو مستعمره یا تابع نه ده."
