د پاکستان په خیبرپښتونخوا ایالت کې حکومتي ملیشو مشر د پنځو تنو نورو سره ووژل شو

وسله والو د پاکستان د ملیشو مشر او پنځه نور کسان ووژل

یوه چارواکي د پنجشنبې په ورځ رسنیو  ته وویل، وسله والو د پاکستان په شمال لویدیځ سرحدي سیمه کې پر یوه موټر ډزې کړي، چې په پایله کې یې د حکومت پلوه ملیشو یو مشر او پنځه نور کسان وژل شوي او بیا یې جسدونه سوځولي دي.

دا برید د چهارشنبې په ورځ په خیبر پښتونخوا ایالت کې شوی، چېرته چې په ګاونډي افغانستان کې په ۲۰۲۱ کال کې واک ته د طالبانو له بیا راستنېدو راهیسې تاوتریخوالی زیات شوی دی.

یوه لوړپوړي اداري چارواکي د نوم نه ښودلو په شرط رسنیو ته وویل، وسله والو پر قربانیانو ډزې کړي، د هغوی پر موټر یې تېل اچولي او اور یې ورته اچولی دی.

دغه چارواکي وویل: "بریدګرو د وېرې خپرولو لپاره موټر ته اور واچاوه، چې د شپږو واړو قربانیانو جسدونه په بشپړه توګه وسوځېدل.

د برید مسوولیت کومې ډلې نه دی منلی، خو دغه چارواکي وویل چې تحریک طالبان پاکستان (ټي ټي پي) – پاکستاني طالبانو – د ملیشو له مشر څخه د  باج غوښتنه کوله، چې هغه یې له ورکولو ډډه کړې وه او د غچ په توګه ووژل شو.

پاکستان په افغانستان کې پر طالبانو تور لګولی چې د ټي ټي پي وسله والو ته یې پناه ورکړې او له هغه ځایه د پولې پورې غاړې بریدونو ته اجازه ورکوي . کابل بیا دا ټول تورونه ردوي.

د دواړو هېوادونو ترمنځ پوله د روانې میاشتې له نښتو وروسته وتړل شوه، چې د اکتوبر په نهمه په کابل کې د یوې چاودنې له امله رامنځته شوه او له امله یې د دواړو غاړو لسګونه ملکي وګړي او سرتېري ووژل شول.

د افغانستان طالبانو حکومت د چاودنې پړه پر پاکستان واچوله او د پولې په اوږدو کې یې غچ اخیستونکي بریدونه پیل کړل.

د اونۍ په پای کې منځګړیتوب شوی اوربند د پنجشنبې په ورځ هم پر خپل ځای و، او ټاکل شوې چې د پاکستان او افغانستان چارواکي د شنبې په ورځ په ترکیه کې سره وګوري.