اسرائیلي اشغالګرو د سې شنبې په ورځ د نابلس په شمال لوېدیځ کې د بیت عمران په کلي کې د برید په ترڅ کې د یو فلسطینی موټر سوځولی دی.
د البدر د بشري حقونو سازمان په یوه بیان کې ویلي، غیرقانوني میشتو سهار وختي پر کلي برید وکړ او یوه فلسطیني موټر ته یې اور ورته کړ او په بشپړه توګه یې ویجاړ کړ.
دغه سازمان زیاته کړه چې غیرقانوني میشتو هڅه وکړه د کلي پر څو کورونو او موټرو هم برید وکړي، خو د سیمې اوسیدونکو ورسره مقابله وکړه او هغوی یې اړ کړل چې له سیمې څخه شاتګ وکړي.
البیدار وویل چې د ملکي وګړو د ملکیتونو په نښه کول او د موټرو سوځول په فلسطینیانو او د هغوی پر ملکیتونو مستقیم برید دی، چې په سیمه کې امنیت او ثبات ګواښي او همدارنګه په لویدیځه غاړه کې تاوتریخوالی زیاتوي.
اشغال شوې لوېدیځه غاړه په دې وروستیو کې د غیرقانوني میشتو د بریدونو له زیاتوالي سره مخ شوې ده. په دغو بریدونو کې د فلسطیني کلیو پر شتمنیو د اور اچولو او پر اوسیدونکو د بریدونو پېښې شاملې دي، په ځانګړې توګه په هغو سیمو کې چې د ناقانونه میشتځایونو او غیرقانوني میشتو د پوستو ترڅنګ موقعیت لري.
د راپورونو له مخې، شاوخوا ۷۵۰ زره اسرائیلي غیرقانوني میشتي په لویدیځه غاړه کې په ۱۴۱ میشت ځایونو او ۲۲۴ میشتیدونکو پوستو کې ژوند کوي، چې له دې ډلې ۲۵۰ زره یې په اشغال شوي ختیځ بیت المقدس کې په ۱۵ میشت ځایونو کې میشت دي. ویل کېږي چې دوی هره ورځ پر فلسطینیانو بریدونه ترسره کوي چې موخه یې د هغوی جبري بېځایه کول دي.
په دغو بریدونو کې د تاسیساتو او کورونو ویجاړول او تخریبول، کرنیزو ځمکو ته اور اچول او د بلدوزرونو په وسیله یې له منځه وړل، او همدارنګه بزګرانو ته خپلو ځمکو ته د لاسرسي مخنیوی هم شامل دي.
د فلسطین د حکومت د استعمار او د دیوال پر وړاندې د مقاومت کمیسیون د معلوماتو له مخې، د مې میاشتې په ترڅ کې اسرائیلي پوځ د فلسطینیانو او د هغوی د شتمنیو پر ضد ۱۱۰۸ بریدونه ترسره کړي، په داسې حال کې چې غیرقانوني میشتو ۵۵۱ بریدونه کړي دي.
د فلسطین د رسمي شمیرو له مخې، د ۲۰۲۳ کال د اکتوبر په میاشت کې پر غزې د اسرائیل د جګړې له پیل راهیسې، اسرائیلي پوځ او غیرقانوني میشتو لږ تر لږه ۱٬۱۶۹ فلسطینیان وژلي، ۱۲٬۶۶۶ نور یې ټپیان کړي، شاوخوا ۲۳٬۰۰۰ کسان یې نیولي او ۳۳٬۰۰۰ نور یې په لویدیځه غاړه کې بې ځایه کړي دي.
