پدې اونۍ کې، کاجا کالاس ویلي وو چې اروپايي ټولنه به د یو شمېر غړو هېوادونو له غوښتنې وروسته، د اسرائیلو له میشت ځایونو سره د سوداګرۍ د محدودولو اختیارونه وڅېړي.
د اسرائیلو د بهرنیو چارو وزیر د پنجشنبې په ورځ وویل چې هغه د اروپايي ټولنې د بهرنۍ پالیسۍ له مشرې کاجا کالاس سره وروسته له هغه ټولې اړیکې پرې کوي، چې هغې په خپلو څرګندونو کې اسرائیل د "اپارټایډ" له هغه رژیم سره ورته بللي وو چې یو وخت یې پر سویلي افریقا واکمني کوله.

د ۲۰۲۳ کال له اکتوبر راهیسې پر غزه د اسرائیلو د نسل وژنې جګړې او په اشغال شوې لویدیځه غاړه کې د فلسطینانو پر وړاندې د غیرقانوني اسرائیلي میشتو وګړو د تاوتریخوالي له امله، د اسرائیلو او اروپايي ټولنې ترمنځ ډیپلوماټیکې اړیکې له سخت فشار سره مخ دي.

د پنجشنبې په ورځ، ګیډون سار د اروپايي ټولنې د بهرنۍ پالیسۍ پر مشرې کالاس تور پورې کړ چې د اسرائیلو په وړاندې "له تعصب څخه ډک او په ښکاره ډول ناعادلانه چلند" کوي. سار پر ایکس (پخواني ټویټر) ولیکل: "پدې وروستیو کې خپره شوه چې مکسیکو ته د خپل سفر پر مهال، هغې اسرائیل د سویلي افریقا له نژاد پرست اپارټایډ رژیم سره پرتله کړي دي."

هغه زیاته کړه: "تر اوسه پورې د هغې لخوا د دې سختې څرګندونې په اړه هیڅ ډول انکار، وضاحت یا ځواب نه دی ورکړل شوی. له همدې امله، د اسرائیلو د بهرنیو چارو د وزیر په توګه، زه له آغلې کالاس سره د ټولو اړیکو له پرې کولو پرته بله لاره نه لرم، تر څو چې هغې خپله دا توهین امیزه ادعا نه وي اخیستې."

د "یوراکټیو" (Euractiv) خبري سرچینې په وینا، کالاس دا څرګندونې تیره میاشت مکسیکو ته د خپل سفر پر مهال د دغه هیواد له حکومتي چارواکو سره په یوه تړلې ناسته کې کړې وې. کالاس د پنجشنبې په ورځ د سار څرګندونو ته په غبرګون کې د اروپايي ټولنې او اسرائیلو ترمنځ پر دوامداره خبرو اترو ټینګار وکړ، خو د "اپارټایډ" د ادعا په اړه یې له څه ویلو ډډه وکړه.

کالاس پر ایکس ولیکل: "زه زموږ خبرو اترو ته ارزښت ورکوم او په درناوي او رغنده ډول د دې لړۍ دوام ته چمتو یم. اروپايي ټولنه تل له اسرائیلو سره رغنده اړیکو ته ژمنه ده. په منځني ختیځ کې د سولې د راوستلو لپاره، د 'دوه هیوادونو حل لاره' لا هم یوازینۍ ممکنه لاره ده." هغې زیاته کړه چې اروپايي ټولنې په لویدیځه غاړه کې غیرقانوني اسرائیلي میشت ځایونه غندلي، ځکه چې دا کار د سولې هدف ته رسیدل ستونزمنوي.

پدې اونۍ کې کالاس ویلي وو چې اروپايي ټولنه به د ځینو غړو هیوادونو په غوښتنه، له غیرقانوني اسرائیلي میشت ځایونو سره د سوداګرۍ د محدودولو پر لارو چارو کار وکړي. هغې دا هم یادونه وکړه چې یو شمېر اروپايي هېوادونو د اسرائیلو د ملي امنیت د وزیر 'ایتامار بن ګویر' پر وړاندې د بندیزونو وړاندیز کړی، که څه هم تر اوسه پرې وروستۍ پرېکړه نه ده شوې.

د بن ګویر د تور لیست کولو غوښتنې وروسته له هغه زیاتې شوې چې هغه تیره میاشت یوه ویډیو خپره کړه چې پکې یې پر هغو فعالانو ملنډې وهلې چې اسرائیلي سرتیرو غزه ته د مرستو په یوه بېړۍ کې نیولي وو.

د بشري حقونو ډلې راپور ورکوي چې په اشغال شوې لویدیځه غاړه کې د فلسطینانو او د دوی پر جایدادونو د اسرائیلي میشتو وګړو بریدونه نږدې هره ورځ ترسره کیږي. د اشغال شوي ختیځ بیت المقدس پرته، اوسمهال تر ۵۰۰،۰۰۰ ډیر اسرائیلیان په لویدیځه غاړه کې په هغو میشت ځایونو کې ژوند کوي چې د نړیوالو قوانینو له مخې غیرقانوني دي.