د "میداس" قضیه د اټومي انرژۍ په دولتي اداره کې د ۱۰۰ میلیونه ډالرو د ناقانونه پیسو د ترلاسه کولو ادعا پورې اړه لري چې لوړپوړي چارواکي او د ولسمشر زیلینسکي یو پخوانی همکار په کې ښکېل دي.

د اوکراین د فساد ضد ادارې (NABU) ویلي، چې د دغه هېواد د فساد ضد څارنوالانو د انرژۍ یو پخوانی وزیر د یوې پراخې څېړنې په ترڅ کې نیولی دی. دې څېړنې تېر نوامبر میاشت کې د لوړې کچې فساد له امله سیاسي بحران رامنځته کړی و.

د "میداس" په نوم دا قضیه د اټومي انرژۍ په دولتي اداره کې د ۱۰۰ میلیونه ډالرو د رشوت په یوه ادعا شوي پلان متمرکزه ده چې یو شمېر لوړپوړي چارواکي او سوداګر په کې ښکېل دي، په شمول د ولسمشر ولادیمیر زلنسکي یو پخوانی همکار.

د یکشنبې په ورځ د فساد ضد ملي ادارې په یوه اعلامیه کې وویل: "نن د یادې ادارې څارنوالانو د انرژۍ پخوانی وزیر د 'میداس' قضیې په چوکاټ کې له دولتي پولې څخه د اوښتلو پر مهال نیولی دی."

اعلامیه زیاتوي: "لومړنۍ څېړنې روانې دي، چې د قانون د غوښتنو سره سم ترسره کیږي." ادارې ویلي چې نور جزئیات به وروسته خپاره شي، خو د نیول شوي کس نوم یې نه دی په ډاګه کړی. که څه هم په رسمي توګه یې نوم نه دی اخیستل شوی، اوکرایني رسنیو په پراخه کچه نیول شوی کس د هیرمن هالوچینکو په توګه پېژندلی دی.

د اوکراین د انرژۍ دوو پخوانیو وزیرانو د دې رسوایۍ له امله استعفا کړې وه، چې له امله یې د زلنسکي د دفتر رئیس هم خپله دنده له لاسه ورکړه. دې دوو وزیرانو او د دفتر رئیس ټولو د ځان پر وړاندې لګول شوي تورونه رد کړي دي.

له فساد سره مبارزه د اوکراین د اصلاحاتو په هڅو کې یو مهم لومړیتوب دی، ځکه چې دا هېواد اروپايي ټولنې ته د غړیتوب په لټه کې دی، کوم چې له اوکراین څخه د لسیزو پخواني فساد د له منځه وړلو غوښتنه کوي.

چارواکو په دې وروستیو اوونیو کې د پارلمان غړي، پخوانۍ لومړۍ وزیره یولیا تیموشینکو او یو پخوانی د ولسمشر سلاکار د بېلابېلو تورونو له امله په نښه کړي دي.