امریکا د غزې د اوربند تړون د څارنې په موخه  اسرائیل ته ۲۰۰ سرتېري استوي
امریکايي چارواکي وايي، دا سرتېري به یو ګډ کنټرول مرکز جوړ کړي او نور امنیتي ځواکونه به چې په غزه کې به کار کوي، سره مدغم کړي ترڅو له اسرائیلي ځواکونو سره د نښتو د مخنیوي لپاره همغږي رامنځته شي.

امریکا  به د غزې د ثبات لپاره د یوه ګډ کاري ځواک د برخې په توګه ۲۰۰ سرتېري په سیمه کې ځای په ځای کړي ، خو هیڅ امریکايي سرتیری به په فلسطیني سیمه کې میشت نشي. دا خبره دوو لوړپوړو امریکايي چارواکو کړې ده.

دغو چارواکو د پنجشنبې په ورځ خبریالانو ته د نوم نه ښودلو په شرط وویل، چې دا ۲۰۰ سرتېري به د یوه داسې ځانګړي ځواک اصلي برخه وي چې د مصر، قطر، تورکیې او احتمالا د متحده عربي اماراتو پوځي استازي به هم پکې شامل وي.

چارواکو وویل، د امریکايي سرتېرو دقیق ځای لا نه دی ټاکل شوی، خو دوی به یو ګډ کنټرول مرکز جوړ کړي او په غزه کې به نور فعال امنیتي ځواکونه مدغم کړي ترڅو له اسرائیلي ځواکونو سره د نښتو د مخنیوي لپاره همغږي وشي.

یوه چارواکي وویل، "غزې ته د هېڅ امریکايي سرتېري د ننوتلو نیت نشته."

چارواکو وویل، هیله ده کله چې د غزې تړون عملي شي، په سیمه کې به تاوتریخوالی کم کړي او د اسرائیل او عربي هېوادونو ترمنځ د اړیکو د عادي کولو د نورو تړونونو لپاره به د خبرو اترو زمینه برابره کړي.

د امریکا ولسمشر ډونالډ ټرمپ د خپلې لومړۍ دورې پر مهال، د ابراهیم تړونونو په نوم د هغو تړونونو منځګړیتوب کړی و چې د اسرائیل او بحرین، متحده عربي اماراتو، مراکش او سوډان ترمنځ د اړیکو د عادي کولو په اړه وو.