د پاکستان په شمال لوېدیځ کې په بمي چاودنه کې شپږ پولیس ووژل شول
پېښه د خیبر پښتونخوا ایالت په ټانک ولسوالۍ کې رامنځته شوې ده.
چارواکو تایید کړه چې د دوشنبې په ورځ د پاکستان په شمال لوېدیځ کې په یوه بمي چاودنه کې لږ تر لږه شپږ پولیس وژل شوي دي.
د سیمه ییزو رسنیو د راپور له مخې، چاودنه د خیبر پښتونخوا ایالت په ټانک ولسوالۍ کې د ګومل بازار پر سړک د پولیسو یوه زغره وال موټر ته نږدې د ریموټ کنټرول په وسیله شوې ده.
د کورنیو چارو وزیر محسن نقوي دا برید په کلکه غندلی او د تاڼې د یوه اضافي مشر په ګډون یې شپږو وژل شویو پولیسو ته درناوی وړاندې کړی دی.
د دولتي راډیو پاکستان د راپور له مخې، لومړي وزیر شهباز شریف د پېښې د "سملاسي پلټنو" امر کړی او لارښوونه یې کړې چې عاملین دې ژر تر ژره د قانون منګولو ته وسپارل شي.
ولسمشر اصف علي زرداري په 'اېکس' ټولنیزه شبکه کې په یوه خپاره شوي بیان کې د پولیسو پر وژل کېدو خپګان او خواشیني څرګنده کړې او د هغوی زړورتیا ته یې درناوی وړاندې کړی دی.
په یوه بل خبر کې، نقوي وویل چې د ترهګرۍ ضد ادارې د دغه ایالت په پېښور، بنو او خیبر ولسوالیو کې د ترهګرۍ پلانونه شنډ کړي، چې په ترڅ کې یې اته "ترهګر" وژل شوي دي.
نقوي وویل: «موږ په خیبر پښتونخوا کې د سولې د ټینګښت لپاره د ځواکونو کړنې ستایو.»
