د اوکراین ولسمشر ولادیمیر زیلینسکي ویلي دي چې د کیف، واشنګټن او مسکو ترمنځ به د نوامبر په میاشت کې درې اړخیزه غونډه وشي چې موخه یې د سولې د ځنډیدلو خبرو اترو بیا پیل کول دي.
زیلینسکي د یکشنبې په ورځ له اوکرایني ټلوېزیون سره په مرکه کې وویل: «موږ خبرو ته چمتو یو. که دا یوه سیمه ییزه مسله وي، نو باید د مشرانو په کچه پرې بحث وشي. نورې موضوعګانې د تخنیکي ډلو په واک کې دي. له همدې امله، دا ټولې موضوعګانې په نومبر میاشت کې څېړل کېدای شي.»
دا اعلان د جمعې په ورځ د کرملین د ویاند دیمیتري پیسکوف له څرګندونو وروسته شوی دی. هغه ویلي وو چې درې اړخیزه غونډه به د نومبر په میاشت کې په متحده عربي اماراتو کې ترسره شي.
د ډیپلوماټیکو هڅو زیاتوالی
دا اعلانونه په داسې حال کې کېږي چې د امریکا د ولسمشر ډونالډ ټرمپ ادارې خپلې ډیپلوماټیکې هڅې زیاتې کړې دي.
د هغه استازي، سټیو ویټکوف، د سې شنبې په ورځ په اوسلو کې د زیلینسکي او اروپایي مشرانو سره ولیدل، مخکې لدې چې د چهارشنبې په ورځ د روسیې له ولسمشر ولادیمیر پوتین سره وګوري.
د دې لوړ پوړو خبرو اترو وروسته، کیف او مسکو دواړو د واشنګټن په منځګړیتوب د مستقیمو خبرو اترو بیا پیلولو لپاره خپل چمتووالی څرګند کړ.
