د امریکا ولسمشر ډونالډ ټرمپ له دې اعلان وروسته چې دوی به اوکراین ته د وسلو لېږد ته دوام ورکړي، داسې ادعا وشوه چې هغه د اضافي پاتریوټ هوايي دفاعي سیستمونو د لېږلو په اړه غور کوي.
د وال سټریټ ژورنالد (WSJ) د دوو امریکايي چارواکیو له قوله د نوم د نه ښودولو په شرط سره راپور ورکړی ، چې امریکا د اوکراین لپاره د اضافي سرچینو د لېږلو په اړه غور کوي.
د راپور له مخې، سپینې ماڼۍ له پنټاګون څخه غوښتنه کړې چې د اضافي وسلو د لېږلو لپاره انتخابونه چمتو کړي، چې په دې کې د پاتریوټ سیستم هم شامل دی.
همدارنګه ویل شوي چې دا هم څېړل کېږي چې ایا نور هېوادونه کولی شي د کیف ادارې ته نور پاتریاټ سیستمونه ورکړي.
یو پخواني پنټاګون چارواکي ادعا کړې چې امریکا درې پاتریوټ سیستمونه اوکراین ته ورکړي، جرمني درې او نورو اروپايي هېوادونو په ټولیز ډول یو ورکړی، خو د ساتنې ستونزو له امله ټول په یو وخت کې فعال نه دي.
ټرمپ ته نږدې یو چارواکي ویلي دي چې سپینه ماڼۍ له کانګرس سره کار کوي څو د جګړې د پای ته رسولو هڅو ملاتړ وکړي.
ټرمپ، چې په سپینه ماڼۍ کې یې د اسرائیلو له لومړي وزیر بنیامین نتانیاهو سره خبرې کولې، خبریالانو ته وویل: "موږ به نورې وسلې (اوکراین ته) ولېږو. موږ یی باید ولېږو؛ هغوی باید د ځان دفاع وکړای شي. هغوی تر ډېر سخت برید لاندې دي."
