د اسرائیلي رسنیو د راپورونو له مخې، ایراني چارواکو د اټومي موضوع په اړه خبرې کړي، خو د دواړو لوریو ترمنځ لوی اختلافات پر خپل ځای پاتې دي.
اسرائیلي رسنیو راپور ورکړی چې امریکا په پاکستان کې د ترسره شویو خبرو اترو پر مهال له ایرانه غوښتي چې د ۲۰ کلونو لپاره خپل د یورانیمو غني کولو فعالیتونه ودروي.
د یکشنبې ورځې په دغو راپورونو کې ویل شوي چې په اسلاماباد کې د دایمي اوربند د رامنځته کولو په موخه په خبرو کې، واشنګټن وړاندیز کړی و چې بریدونه به ودروي او د ایران د کنګل شویو پیسو یوه برخه به ازاده کړي.
د دې په بدل کې، ویل کیږي چې امریکا غوښتنه کړې چې تهران باید د دوو لسیزو لپاره د یورانیمو غني کول ودروي، خپل غني شوي یورانیم بهر ته صادر کړي او په هرمز تنګي کې به پرته له کوم محصول (ټیکس) اخیستلو د کښتیو ازاد تګ راتګ ته اجازه ورکړي.
راپورونو یادونه کړې چې ایراني چارواکو د اټومي موضوع په اړه بحثونه وکړل، خو د دواړو لوریو ترمنځ لوی اختلافات لا هم پر خپل ځای پاتې وو.
د هوکړې په ترلاسه کولو کې پاتې راتلل
د امریکا د ولسمشر مرستیال جې ډي ونس تر دې وړاندې ویلي وو چې په اسلاماباد کې له ایران سره مستقیمې خبرې اترې پرته له کومې هوکړې پای ته ورسېدې.
ونس وویل: "موږ ۲۱ ساعته پر دې کار وکړ او له ایرانیانو سره مو یو شمېر مهمې ناستې وکړې. دا یو ښه خبر دی. خو بد خبر دا دی چې موږ کومې هوکړې ته ونه شو رسېدلی."
په ورته وخت کې، ایراني رسنیو ویلي چې په خبرو کې د یوې چوکاټي هوکړې په ترلاسه کولو کې پاتې راتلل د امریکا د هغو غوښتنو له امله وو چې دوی "نامعقولې او زیاتې" (بللې دي.
واشنګټن او تهران تېره اونۍ پر دوه اونیز اوربند له هوکړې وروسته، د شنبې په ورځ د هغې جګړې د پای ته رسولو لپاره په نادره ډول مخامخ خبرې وکړې چې د فبرورۍ پر ۲۸مه پیل شوې وه. خو دا خبرې اترې د یکشنبې په سهار وختي پرته له کومې هوکړې پای ته ورسېدې.
