د امریکا یو زیات شمیر ایالتونو د ۱۰۰،۰۰۰ ډالرو H-1B ویزې فیس پر سر د ټرمپ پر وړاندې اقامه د دعوه کړې
کالیفورنیا او ۱۸ نور ایالتونه وايي چې وړاندیز شوی فیس د کډوالۍ له قانون څخه سرغړونه ده، په داسې حال کې چې سپینه ماڼۍ استدلال کوي چې دا به د H-1B پروګرام له ناوړه ګټې اخیستنې مخه ونیسي.

کالیفورنیا او ۱۸ نورو امریکایي ایالتونو د ولسمشر ډونالډ ټرمپ د هغه ۱۰۰،۰۰۰ ډالري فیس د مخنیوي لپاره اقامه د دعوه کړې چې د لوړ مهارت لرونکو بهرنیو کارګرانو لپاره پر H-1B ویزو لګول شوی دی. دا خبره د کالیفورنیا د لوی څارنوال راب بونټا دفتر کړې ده.

دا دعوه، چې د ماساچوسټس په فدرالي محکمه کې ثبت شوې، لږ تر لږه دریم قانوني اقدام دی چې د سپټمبر په میاشت کې د ټرمپ له خوا د اعلان شوي فیس پر وړاندې کیږي.

دا وړاندیز به د H-1B ویزې د ترلاسه کولو لګښت په چټکۍ سره لوړ کړي، چې کارګمارونکي یې دا مهال د ترلاسه کولو لپاره د ۲۰۰۰ او ۵۰۰۰ ډالرو ترمنځ پیسې ورکوي.

د بونټا دفتر په یوه اعلامیه کې ویلي چې ټرمپ د دې فیس د لګولو واک نه لري او دا له فدرالي قانون څخه سرغړونه ده، کوم چې د کډوالۍ ادارو ته یوازې د هغو فیسونو د راټولولو اجازه ورکوي چې د ویزو پروګرامونو د ادارې لګښتونه پوره کوي.

د H-1B پروګرام امریکایي کارګمارونکو ته اجازه ورکوي چې په تخصصي برخو کې بهرني کارکوونکي وګماري.

د ټکنالوژۍ شرکتونه، چې ډیری یې په کالیفورنیا کې دي، د مسلکي کارکوونکو د ګمارلو لپاره پر دغو ویزو ډیره تکیه کوي.

بونټا، چې یو ډیموکرات دی، وویل چې وړاندیز شوی فیس به د اړینو خدمتونو لکه زده کړې او روغتیا پر چمتو کوونکو غیر ضروري مالي فشار راوړي.

هغه خبرداری ورکړ چې دا کار کولی شي د کارګرانو کمښت لا پسې زیات او د خدمتونو وړاندې کولو ته ګواښ پېښ کړي.

په دې دعوه کې له کالیفورنیا سره نیویارک، ماساچوسټس، ایلینوی، نیوجرسي او واشنګټن ایالتونه هم شامل دي.

سپینې ماڼۍ د نورو دعوو په ځواب کې له دې اقدام څخه دفاع کړې او ویلي یې دي چې دا فیس د ټرمپ له اجراییوي واکونو څخه قانوني استفاده ده او کارګمارونکي به د H-1B پروګرام له ناوړه ګټې اخیستنې څخه راوګرځوي.

د H-1B او نورو کاري ویزو منتقدین استدلال کوي چې کله ناکله له دغو ویزو څخه د امریکایي کارکوونکو پر ځای د هغو بهرنیو کارکوونکو د ګمارلو لپاره کار اخیستل کیږي چې په ټیټه تنخوا کار کولو ته تیار وي.

خو سوداګریزې ډلې او لوی شرکتونه بیا وايي چې دا پروګرام په امریکا کې د وړ کارکوونکو د کمښت په پوره کولو کې مرسته کوي.

د امریکا د سوداګرۍ خونې، د کارګرانو اتحادیو، کارګمارونکو او مذهبي ډلو یو ایتلاف هم د دې فیس پر وړاندې جلا دعوې کړې دي.

تمه کیږي چې په واشنګټن ډي سي کې به یو قاضي راتلونکې اونۍ د سوداګرۍ خونې د قضیې په اړه اوریدنه وکړي.

د ټرمپ د حکم له مخې، د H-1B نوي ترلاسه کوونکي به تر هغه وخته امریکا ته له ننوتلو منع وي، تر څو چې یې ملاتړی کارګمارونکی ۱۰۰،۰۰۰ ډالره فیس نه وي ورکړی.

ادارې ویلي چې دا اقدام پر هغو کسانو نه پلي کیږي چې لا دمخه ویزې لري یا هغو چې د سپټمبر له ۲۱مې مخکې یې غوښتنلیکونه ورکړي دي.