د امریکا ولسمشر ډونالډ ټرمپ اعلان وکړ چې د برازیل څخه امریکا ته په ټولو واردېدونکو توکو باندې به ۵۰ سلنه مالیه ولګوي. هغه د دې پرېکړې دلیل د برازیل د پخواني ولسمشر جیر بولسونارو سره چلند او د امریکایي ټولنیزو رسنیو پر وړاندې د سانسور تورونه په ګوټه کړل.
ټرمپ د چهارشنبې په ورځ په خپل شخصي ټروت سوشیل پلټفارم کې په یوه پیغام کې د بولسونارو پر وړاندې روانه محاکمه "نړیواله رسوایي" وبلله.
هغه وویل: "دا محاکمه باید ترسره نه شي. دا یوه سیاسي دسیسه ده چې باید سمدستي پای ته ورسېږي!" ټرمپ د بولسونارو ستاینه وکړه او هغه یې د خپل واکمنۍ پر مهال "په نړۍ کې یو ډېر درناوي وړ مشر" وباله.
بولسونارو او اووه نور کسان د کودتا هڅې په تور تورن شوي دي، وروسته له هغې چې د برازیل سترې محکمې د هغه او د هغه د متحدینو پر وړاندې تورونه ومنل.
د سترې محکمې د پنځو قاضیانو په یوه متفقه پرېکړه کې وویل شول چې د بولسونارو پر وړاندې تورونه د یوې جنایي محاکمې وړ دي.
د بولسونارو د مجرم بلل کیدو په صورت کې کیدای شي چې هغه تر ۳۰ کلونو پورې د بند سزا سره مخامخ شي.
ټرمپ د برازیل ستره محکمه تورنه کړه چې د امریکا د وینا د آزادۍ حق یې تر پښو لاندې کړی دی. هغه وویل چې محکمې "د امریکا ټولنیزو رسنیو ته سلګونه پټ او غیرقانوني سانسور امرونه ورکړي دي، او هغوی یې د میلیونونو ډالرو جریمو او د برازیل د ټولنیزو رسنیو له بازار څخه د ایستلو ګواښ کړی دی."
د اګست له لومړۍ نېټې څخه به د امریکا لخوا د برازیل پر ټولو صادراتو ۵۰ سلنه مالیه ولګول شي.
ټرمپ زیاته کړه: "هغه توکي چې د دې مالیې د مخنیوي لپاره د نورو هېوادونو له لارې لیږدول کېږي، هم به د دې لوړې مالیې تابع وي."
هغه وویل: "مهرباني وکړئ پوه شئ چې دا ۵۰ سلنه شمېره د هغه څه په پرتله ډېره کمه ده چې موږ ستاسو هېواد سره د مساوي لوبې ډګر لپاره اړتیا لرو."
ټرمپ وویل چې دا ګام د هغه بې عدالتۍ د سمولو لپاره اړین دی چې د هغه په وینا د برازیل حکومت ترسره کړې ده.
ټرمپ د برازیل د غبرګون په صورت کې د نورو مالیاتو د لګولو خبرداری ورکړ. هغه زیاته کړه: "هره شمېره چې تاسو د مالیاتو د لوړولو لپاره غوره کړئ، زموږ د ۵۰ سلنه مالیې سره به اضافه شي."
ټرمپ د چهارشنبې په ورځ، د پنځو افریقایي هېوادونو سره د یوې غونډې پر مهال وویل چې دا مالیې "د عام عقل، د کسرونو، د کلونو په اوږدو کې زموږ سره د چلند او د خامو شمېرو پر بنسټ" دي.
هغه زیاته کړه: "برازیل، د بېلګې په توګه، زموږ سره ښه چلند نه دی کړی. هېڅ ښه نه دی کړی."
