د تورکیې ولسمشر اردوغان د غزې د اوربند تړون هرکلی وکړ او د فلسطین نه يي د ملاتړ د دوام ژمنه وکړه
اردوغان د یوه خپلواک، او مستقل فلسطیني دولت د جوړېدو په اړه د تورکیې پر نه بدلېدونکي دریځ ټینګار وکړ.
د تورکیې ولسمشر رجب طیب اردوغان د غزې د اوربند تړون هرکلی وکړ، او د سختو شرایطو سره سره د فلسطینیانو د مقاومت او وقار ستاینه وکړه.
د تورکیې ولسمشر رجب طیب اردوغان په شرم الشیخ کې د خبرو اترو وروسته د اسرائیل او د فلسطین مقاومتي ډلې حماس ترمنځ د اوربند تړون په اړه خپله خوښي څرګنده کړه، چې په کې تورکیې هم رول لوبولی دی.
اردوغان د پنجشنبې په ورځ په یوه بیانیه کې د امریکا له ولسمشر ډونالډ ټرمپ څخه مننه وکړه چې اوربند ته د اسرائیل د هڅولو لپاره یې اړینه سیاسي اراده وښودله، او له قطر او مصر څخه یې هم د تړون په رسېدو کې د دوی د پام وړ ملاتړ له امله مننه وکړه.
د تورکیې ولسمشر وویل چې تورکیه به د تړون پلي کول له نږدې وڅاري او د سولې پروسې سره مرستې ته به ژمن پاتې شي.
هغه د ۱۹۶۷ کال د پولو پر بنسټ د یوه خپلواک، مستقل فلسطیني دولت د جوړېدو په اړه د انقرې پر نه بدلېدونکي دریځ ټینګار وکړ چې پلازمېنه یې ختیځ بیت المقدس وي.
اردوغان له هغو فلسطینیانو سره پیوستون څرګند کړ چې په تېرو دوو کلونو کې یې ډېر کړاوونه او زیانونه زغملي دي، او د سختو شرایطو سره سره یې د دوی د مقاومت او وقار ستاینه وکړه.
یوې سرچینې وویل چې تمه کیږي چې د غزې لپاره د ټرمپ د پلان د لومړي پړاو د تړون د لاسلیک مراسم به د جمعې په ورځ د لندن په ځايي وخت د سهار په بجې او د تورکیې په وخت له غرمې مخکې په ۱۱ بجو لاسلیک شي.
سرچینې زیاته کړه، تمه کیږي چې اوربند به په غزه کې د تړون له لاسلیک وروسته په سیمه کې نافذ شي.
د بیت المقدس پوسټ ورځپاڼې راپور ورکړی چې قطر، مصر، امریکا متحده ایالتونو او تورکیې د غزې د سولې تړون د تضمین کوونکو په توګه لاسلیک کړی دی.
اسرائیل او حماس ویلي چې دوی د اوږدې مودې انتظار وروسته د اوربند پر تړون موافقه کړې، چې دا د ټرمپ د پلان لومړی پړاو دی چې په غزه کې د تل ابیب جګړه پای ته ورسوي، کومې چې تر ۶۷۰۰۰ ډیر فلسطینیان وژلي او منځنی ختیځ یې له سره جوړ کړی دی.
په دې تړون کې به درې مهم ټکي شامل وي: د اسراییلي بندیانو او فلسطینی بندیانو خوشې کول، د اسراییلي ځواکونو وتل یوې ټاکلې کرښې ته، او له کلونو محاصرې او جګړې وروسته غزې ته د سختو اړتیا وړ مرستو زیاتوالی.
