په پاکستان کې د پوځي افسرانو په ګډون ۱۱ امنیتي سرتیري ووژل شول

د خیبر پښتونخوا ایالت په اورکزیو ولسوالۍ کې د پوځ د استخباراتي عملیاتو پر مهال ۱۹ وسله وال هم وژل شوي دي. په پاکستان کې د ۲۰۲۵ کال په دریمه ربع کې د تاوتریخوالي پېښې د تیرې ربعې په پرتله ۴۶ سلنه زیاتې شوي دي.

د پاکستان پوځ د چهارشنبې په ورځ وویل، چې د هیواد په شمال لویدیځ کې له وسله والو سره په نښته کې د دوو افسرانو په ګډون لږ تر لږه ۱۱ پاکستاني امنیتي سرتیري وژل شوي دي.

د پوځ مطبوعاتي څانګې په یوه خبرپاڼه کې ویلي، چې امنیتي ځواکونو د سې شنبې په شپه د خیبر پښتونخوا ایالت په اورکزیو ولسوالۍ کې استخباراتي عملیات ترسره کړل.

د خبرپاڼې له مخې، د عملیاتو په ترڅ کې د ځواکونو د "اغېزمنو ډزو" له امله ۱۹ ترهګر ووژل شول، خو د ډزو په تبادله کې ۳۹ کلن ډګرمن جنید عارف، د هغه مرستیال ۳۳ کلن جګړن طیب راحت او نهه نور سرتیري ووژل شول.

تیره میاشت هم د دغه ایالت په جنوبي وزیرستان ولسوالۍ کې له ترهګرو سره د ډزو په تبادله کې لږ تر لږه ۱۲ پاکستاني پوځیان وژل شوي وو.

په وروستیو کلونو کې په پاکستان کې د وسله والو بریدونو کې زیاتوالی راغلی دی. اسلام اباد پر کابل تور لګوي چې په پاکستان کې د ټي ټي پي ترهګرو د بریدونو په مخنیوي کې پاتې راغلی دی. خو افغانستان بیا دا تورونه ردوي او ټینګار کوي چې خاوره به یې د ګاونډي هیواد پر ضد د بریدونو لپاره ونه کارول شي.

د افغانستان په اړه د مسکو فارمټ په ناسته کې، چې د سې شنبې په ورځ ترسره شوه، پاکستان یو ځل بیا له یوه سوله ییز، باثباته او امن افغانستان سره خپله ژمنتیا څرګنده کړه. د افغانستان لپاره د پاکستان ځانګړي استازي محمد صادق وویل چې "له افغان خاورې څخه د ټولو ترهګرو ډلو د له منځه وړلو او په اغېزناکه توګه د ترهګرۍ سره د مبارزې لپاره یې پر ګډو سیمه ییزو هڅو" خبرې وکړې.

د افغانستان بهرنیو چارو وزیر امیر خان متقي، په افغانستان کې د بېلابېلو وسله والو ډلو د شتون په اړه د څو هیوادونو د ګډې اعلامیې په ځواب کې وویل، چې د هغه په هیواد کې دا ډول ډلې شتون نه لري. هغه ټینګار وکړ، "زه غواړم په ډاګه ووایم چې په افغانستان کې هیڅ داسې ډله نشته چې زموږ خاوره د نورو هیوادونو لپاره د ستونزو جوړولو په موخه وکاروي."

نوموړي زیاته کړه، افغان استخباراتي ادارو داسې نښې موندلې چې داعش او نورو ډلو په دې وروستیو کې د سیمې په نورو هیوادونو کې روزنیز مرکزونه جوړ کړي، "چې دا د افغان حکومت لپاره د اندیښنې وړ خبره ده."

د ۲۰۲۵ کال په دریمه ربع کې په پاکستان کې تاوتریخوالی زیات شوی

د څیړنې او امنیتي مطالعاتو مرکز (CRSS) د یوه راپور له مخې، د ۲۰۲۵ کال په دریمه ربع کې په پاکستان کې تاوتریخوالی په چټکۍ سره زیات شوی، چې د ترهګریزو بریدونو او ترهګرۍ ضد عملیاتو په ۳۲۹ پېښو کې لږ تر لږه ۹۰۱ کسان وژل شوي او ۵۹۹ نور ټپیان شوي دي.

دا ارقام د تیرې ربعې په پرتله ۴۶ سلنه زیاتوالی ښیي. د سږ کال تر پایه د وژل شویو کسانو شمیر ۲۴۱۴ ته رسیدلی، چې دا ښیي چې ۲۰۲۵ کال به د تیر کال په پرتله چې ۲۵۴۶ کسان پکې وژل شوي وو، ډیر خونړی وي.

د خیبر پښتونخوا او بلوچستان ایالتونو د ټول تاوتریخوالي نږدې ۹۶ سلنه برخه جوړوي، چې خیبر پښتونخوا تر ټولو ډیر ځپل شوی، چیرې چې د تاوتریخوالي ۷۱ سلنه (۶۳۸) تلفات او ۶۷ سلنه (۲۲۱) پېښې ثبت شوي دي. ورپسې بلوچستان دی چې په همدې موده کې ۲۵ سلنه (۲۳۰) تلفات او ۸۵ پېښې لري.