د روسیې د بهرنیو چارو وزیر سرګي لاوروف پر اسرائیلو سخته نیوکه وکړه او وویل چې منځنی ختیځ يي د چاودنې له ګواښ سره مخ کړی دی. لاوروف په ایران او قطر د اسرائیلو پوځي بریدونه وغندل او د اشغال شوې لوېدیځې غاړې د الحاق له پلانونو سره یې مخالفت وکړ.
لاوروف د شنبې په ورځ د ملګرو ملتونو په عمومي اسامبله کې د وینا پر مهال وویل، چې د اسرائیلو له خوا "د فلسطینیانو پر وړاندې د ځواک ناقانونه او نامتناسبه کارول او د ایران، قطر، یمن، لبنان، سوریې او عراق پر وړاندې تېري کوونکي اقدامات نن ورځ ټول منځنی ختیځ د چاودنې له ګواښ سره مخ کړی دی."
لاوروف د اسرائیلو د لومړي وزیر نتنیاهو د سخت دریځو ښي اړخو متحدینو پر هغو وړاندیزونو سخته نیوکه وکړه چې غواړي اشغال شوې لوېدیځه غاړه الحاق کړي، او دا یې "د فلسطیني دولت د جوړولو په اړه د ملګرو ملتونو د پرېکړو د خپو لاندې کولو " هڅه وبلله.
هغه زیاته کړه: "د لوېدیځې غاړې د الحاق پلانونو لپاره هېڅ توجیه نشته. دا په ډیپلوماټیک لحاظ اساساً یوه کودتا ده."
په وروستیو ورځو کې، فرانسې، برتانیا، او څو نورو لوېدیځو قدرتونو د فلسطین دولت په رسمي توګه په رسمیت وپېژانده، او په غزه کې یې د اسرائیلو د روانې جګړې په اړه خپله ناهیلي څرګنده کړه. امریکا متحده ایالتونو، چې د اسرائیلو تر ټولو پیاوړی ملاتړی دی، له دې اقدام سره مخالفت وکړ او له نتنیاهو یې وغوښتل چې وروسته له هغه چې عرب متحدینو اندېښنه وښوده، د الحاق له پلانه ډډه وکړي.
لاوروف د فلسطین پر ځنډني په رسمیت پېژندلو ملنډې ووهلې او ویې پوښتل: "ولې یې دومره وخت ونیو؟" هغه اشاره وکړه چې د ملګرو ملتونو له عمومي اسامبلې سره هم مهاله دا په رسمیت پېژندل ښايي د دې تمې ښکارندويي وکړي چې د اسرائیلو د بریدونو په ترڅ کې به "د په رسمیت پېژندلو لپاره نه څه او نه څوک پاتې وي."
روسیې د شوروي اتحاد له وخته د فلسطین دولت په رسمیت پېژندلی دی.
"پر ایران د ملګرو ملتونو بندیزونه ناقانونه دي"
لاوروف همدارنګه د ایران په اړه د لوېدیځ پر چلند هم نیوکې وکړې او لوېدیځ قدرتونه یې د ملګرو ملتونو د بندیزونو په بیا لګولو سره د ډیپلوماسۍ په سبوتاژ کولو تورن کړل.
د روسیې د بهرنیو چارو وزیر د ملګرو ملتونو عمومي اسامبلې ته وویل چې مسکو پر ایران د ملګرو ملتونو بندیزونه د هغو د بېرته پلي کولو لپاره د 'ټولو لوېدیځو لاسوهنو' ترڅنګ 'ناقانونه' ګڼي.
هغه د بندیزونو د مودې غځولو لپاره د روسیې او چین ګډه هڅه ردول وغندل او دا یې د لوېدیځ د هغې "هیلې ثبوت" وباله چې "د باج اخیستنې او فشار له لارې له تهران څخه یو اړخیز امتیازات ترلاسه کړي."
د ناټو کړکېچونو ته په اشارې، لاوروف د هر ډول تېري پر وړاندې د "پرېکنده ځواب" خبرداری ورکړ. دا خبرې یې د امریکا د ولسمشر ډونالډ ټرمپ د هغو څرګندونو په ځواب کې وې چې د ناټو له هوايي حریم څخه د سرغړونې په صورت کې یې د روسي الوتکو د ویشتلو ملاتړ کړی و.
لاوروف وویل، "روسیې هېڅکله دا ډول نیتونه نه لرل او نه یې لري"، خو ټینګار یې وکړ: "زما د هېواد پر وړاندې هر ډول تېري ته به پرېکنده ځواب ورکړل شي."
لاوروف د ناټو له هوايي حریم څخه د روسي الوتکو وروستۍ سرغړونې ومنلې خو هڅه یې وکړه چې وضعیت د لوېدیځ د دښمنۍ پایله وښيي.
هغه د ټرمپ ستاینه وکړه چې د "ایډیالوژیک دریځ" له غوره کولو پرته یې عملي همکاري تعقیب کړې ده، سره له دې چې ټرمپ مخکې د روسیې د کړنو په اړه ناهیلي څرګنده کړې وه او د اوکراین په اړه یې بېلابېل نظرونه لرل.
