د فلسطينی کډوالو لپاره د ملګرو ملتونو مرستندويه ادارې د راپور له مخې، په غزه کې له ۷۵ زرو څخه زيات فلسطينیان د ملګرو ملتونو په ۱۰۰ ودانيو کې پناه اخيستې ده.
د ملګرو ملتونو ادارې وويل چې ډېری ودانۍ د اسرائيلي بريدونو له امله زيانمنې شوې او له خلکو ډکې دي.
د فلسطينی کډوالو لپاره د ملګرو ملتونو مرستندويه ادارې (UNRWA) د سې شنبې په ورځ وويل چې له ۷۵ زرو څخه زيات بې کوره فلسطينیان د غزې په ۱۰۰ ودانيو کې پناه اخيستې ده، چې ډېری يې د اسرائيلي بريدونو له امله زيانمنې شوې دي.
ادارې په خپل يوه بيان کې چې پر X (پخوانی ټويټر) خپور شوی، وويل: "په غزه کې نږدې ۷۵ زره بې کوره شوي کسان د ملګرو ملتونو د ۱۰۰ څخه زياتو ودانيو کې پناه اخلي — چې ډېری يې زيانمنې او له خلکو ډکې دي."
د فلسطينی کډوالو لپاره د ملګرو ملتونو مرستندويه ادارې ټينګار وکړ چې د دوی ټيمونه "نه ستړي کیدونکي کار کوي څو د پناه ځایونه خوندي او د انسان د وقار وړ وساتي، هره ورځ د اوبو، صفايې، کثافاتو د راټولولو او روغتيايي ملاتړ خدمتونه برابروي."
د غزې د حکومت د رسنيو د دفتر د معلوماتو له مخې، د تېرو دوو کلونو په اوږدو کې د تل ابيب د نسل وژنې جګړې له امله له ۲.۴ ميليونه اوسېدونکو څخه شاوخوا دوه ميليونه کسان بې ځايه شوي دي.
د غزې د حکومت د رسنيو دفتر زياته کړه چې نږدې ۲۸۸ زره فلسطیني کورنۍ بې کوره شوې دي، او بې ځايه شوي ملکي وګړي په تنګو او له خلکو ډکو سيمو کې د بنسټیزو اړتياوو له نشتوالي سره مبارزه کوي.
د اکتوبر په ۱۰مه، د امريکا د ولسمشر ټرمپ د ۲۰ مادو له پلان لاندې د اوربند لومړۍ مرحله په غزه کې عملي شوه.
د پلان د لومړۍ مرحلې له مخې، د فلسطيني بنديانو په بدل کې به اسرائيلي بنديان خوشې کېږي. دغه پلان د غزې د بيا رغونې او د حماس پرته د يوې نوې ادارې د جوړېدو وړانديز هم کوي.
د غزې د روغتيا وزارت د معلوماتو له مخې، د ۲۰۲۳ کال د اکتوبر راهيسې د اسرائيلو د نسل وژنې جګړې له امله له ۶۸ زرو او ۸۰۰ زيات کسان وژل شوي او له ۱۷۰ زرو او ۶۰۰ زيات نور ټپيان شوي دي.
