د چین ولسمشر شي هند یو 'ملګری او شریک' وباله او ددې هیواد سره  يي د باثباته اړیکو غوښتنه وکړ.

د چین ولسمشر شي جین پینګ د جمهوریت ورځې په مناسبت خپل پیغام کې ولسمشرې دروپادي مورمو ته ویلي، چې چین او هند "ښه ګاونډیان، ملګري او شریکان" دي، په داسې حال کې چې دواړه لوري د کلونو سرحدي کړکېچ وروسته د اړیکو د ټینګښت هڅې کوي.

د چین دولتي خبري اژانس شینهوا د دوشنبې په ورځ راپور ورکړ چې د چین ولسمشر شي جین پینګ د هند د جمهوریت ورځې په مناسبت ولسمشرې دروپادي مورمو ته د مبارکۍ په ترڅ کې وویل چې چین او هند "ښه ګاونډیان، ملګري او شریکان" دي.

د شینهوا په وینا، شي وویل چې په تېر کال کې، د چین او هند اړیکو پرمختګ ته دوام ورکړی او "د نړۍ د سولې او سوکالۍ په ساتلو او وده کې خورا لوی اهمیت لري."

شي وویل چې چین تل په دې باور دی چې "ښه ګاونډیان، ملګري او شریکان" اوسېدل د دواړو، چین او هند لپاره سمه پرېکړه ده.

شینهوا وویل، هغه چین او هند ته د "اژدها او فیل چې یوځای نڅا کوي" په توګه اشاره وکړه.

شي وویل، هیله لري چې دواړه لوري به د سالم او باثباته اړیکو د ودې لپاره خپلمنځي راکړه ورکړه او همکاري پراخه کړي او د یو بل اندېښنې به حل کړي.

 د اټومي وسلو لرونکي اسیایي ګاونډیان ۳،۸۰۰ کیلومتره (۲،۴۰۰ مایله) ګډه پوله لري چې په سمه توګه نه ده په نښه شوې او له ۱۹۵۰ لسیزې راهیسې پرې شخړې روانې دي.

د دواړو هېوادونو اړیکې په ۲۰۲۰ کال کې له یوې نښتې وروسته خرابې شوې، چې په کې ۲۰ هندي او څلور چینایي سرتېري په لاس په لاس جګړه کې ووژل شول. له هغې وروسته، د همالیا پوله د دواړو خواوو له خوا په لوړه کچه نظامي شوه.

دواړو هېوادونو تېر کال د یو لړ لوړ پوړو دوه اړخیزو لیدنو وروسته د اړیکو په ښه کولو پیل وکړ.

په ۲۰۲۵ کال کې مستقیمې الوتنې بیا پیل شوې، ځکه چې دواړو هېوادونو د امریکا د ولسمشر ډونالډ ټرمپ د جګړه ییزې بهرنۍ تګلارې په شالید کې د سوداګرۍ او پانګونې بهیر ګړندی کړ.